ඉන්දියාවේ 13 වැනි ජනාධිපතිවරයා ලෙස ප‍්‍රනාබ් මුඛර්ජි අද (25) දිවුරුම් දීමට නියමිතය.

කොංග‍්‍රස් පක්ෂයේ ජ්‍යේෂ්ඨ ඇමැතිවරයකු මෙන්ම ඉන්දියාවේ කෘතහස්ත දේශපාලනඥයකු ද වන 76 හැවිරිදි මුඛර්ජි පාලක කොංග‍්‍රස් පක්ෂයේ හිටපු මුදල් ඇමැතිවරයාය.

මුඛර්ජි ජනපති ධුරයට පත් වූයේ පසුගිය 19 වැනිදා පැවැති ජනාධිපති තේරීමේ ඡුන්ද විමසුමෙන් සියයට 70කට ආසන්න වැඩි ඡුන්ද ප‍්‍රතිශතයක් දිනා ගැනීමත් සමඟය. මීළඟ වසර පහක කාලය පුරා ඔහු ජනපති ධුරයේ කටයුතු කරනු ඇත.

පාර්ලිමේන්තු ප‍්‍රධාන ශාලාවේදී ඉන්දීය වේලාවෙන් පෙරවරු 11.30ට ප‍්‍රනාබ් මුඛර්ජි මහතා ජනපති ධූරයේ දිවුරුම්දීමට නියමිත බව එරට රජයේ ප‍්‍රකාශකයෙක් පැවැසීය.

ඉන්දියාවට නව ජනාධිපතිවරයෙක් පත් වූයේ හිටපු ජනාධිපතිනිය ප‍්‍රතිභා පාටෙල්ගේ නිල කාලය ඊයේ (24) අවසන් වීමත් සමඟය. ඉන්දියාවේ ජනපති ධුරයට පත් ප‍්‍රථම කාන්තාව ඇයයි. ඇය එම ධුරයට පත්වුණේ 2007 වසරේදීය.

ඉන්දියාවේ ආණ්ඩුක‍්‍රම ව්‍යවස්ථාව යටතේ එරට ජනාධිපතිවරයා නාමික රාජ්‍ය පාලකයකු වන අතර ඔහුට වඩා බලතල හිමි වන්නේ අගමැතිවරයාටය.