(අතුල බණ්ඩාර)

ගලෙන්බිදුනුවැව සෞඛ්‍ය වෛද්‍ය නිලධාරී බලප්‍රදේශයේ පහළ දික්වැව ගම්මානයේ  පුද්ගලයන් 52කට කොරෝනා වයිරසය ආසාදනය වී ඇති බව තහවුරු වීම නිසා එම ගම්මානය හුදකලා කළ බව ප්‍රදේශයේ සෞඛ්‍ය බලධාරීහු පවසති.

ගලෙන්බිදුනුවැව පරිපාලන මහජන සෞඛ්‍ය පරීක්ෂක අරුණ සෙනවිරත්න මහතා ප්‍රකාශ කළේ , මීට දින කිහිපයකට පෙර එම ගම්මානයේ නිවසක , සෞඛ්‍ය අංශ දැනුවත් නොකොට, සෞඛ්‍ය ආරක්ෂක ක්‍රමවේදයන්ද උල්ලංඝනය කරමින් පැවැත්වූ විවාහ මංගල උත්සවයකට සහභාගිවූවන් අතරින් පිරිසක් මේ කොරෝනා ආසාධිතයින් අතර සිටින බවයි.

පවුල් 250 ක පුද්ගලයන් 756 ක් පදිංචිව සිටින මේ ගම්මානයේ වැඩි දෙනකු ඥාතීන් බවත්, ඒ අතරින් 150 කට වැඩි පිරිසක් විවාහ මංගල උත්සවයට සහභාගිවී තිබෙන බවත් පොලිසිය කළ සොයා බැලීම් වලදී අනාවරණය වී තිබේ.

විවාහ මංගල උත්සවයට සහභාගිවූවන් අතරින් කිහිප දෙනකුට කොරෝනා රෝග ලක්ෂණ පෙන්නුම් කිරීම නිසා , ඉකුත් 30 වැනිදා ඔවුන්ගෙන් හයදෙනකු සඳහා රැපිඩ් ඇන්ටිජන් පරීක්ෂණ සිදුකළ බවයි. ඉන් ඒ හය දෙනාටම කොරෝනා වෛරසය ආසාදනය වී තිබෙන බව තහවුරුවීම නිසා, 31 වැනිදා තවත් ගම්වැසියන් 72 කක් තෝරාගෙන රැපිඩ් ඇන්ටිජන් පරීක්ෂණ සිදුකළ බවත් ඉන් 33 දෙනකුට කොරෝනා වයිරසය ආසාදනය වී තිබෙන බව තහවුරුවූ බවත් කි ඒ මහතා, ඒ අය අතර මනාලයා , මනාලිය සහ මනාලයාගේ මවද සිටින බව පැවසිය.