ජනාධිපති ඩොනල්ඩ් ට්‍රම්ප්, ඇමෙරිකා එක්සත් ජනපදය ලෝක සෞඛ්‍ය සංවිධානයෙන් ඉවත් කරගැනීමට ගත් තීරණය වෙනස් කරන බව ඩිමොක්‍රටික් පක්ෂයේ ජනාධිපති අපේක්ෂක ජෝ බයිඩන් ඊයේ (7) පැවැසීය.

තමා ජනාධිපති ධුරයට පත්වුවහොත් ‘‘පළමු දිනයේදීම’’ එම තීරණය වෙනස් කරන බව හෙතෙම කීය.

බැරැක් ඔබාමා ජනාධිපති ධුරය හොබවන සමයේදී ඇමෙරිකා එක්සත් ජනපදයේ උප ජනාධිපති ධුරය හෙබවූ ජෝ බයිඩන් ලබන නොවැම්බර් පැවැත්වෙන ඇමෙරිකානු ජනාධිපතිවරණයට ඉදිරිපත් වී සිටියි.

රිපබ්ලිකන් පක්ෂය නියෝජනය කරමින් සිය දෙවැනි සහ අවසන් ධුර කාලය සඳහා ජනාධිපතිවරණයට ඉදිරිපත් වී සිටින ජනාධිපති ඩොනල්ඩ් ට්‍රම්ප්ගේ ප්‍රධාන ප්‍රතිවාදියා වන්නේ ද ජෝ බයිඩන් ය.

ජනාධිපති ඩොනල්ඩ් ට්‍රම්ප්, ඇමෙරිකා එක්සත් ජනපදය ඊයේ (7) ලෝක සෞඛ්‍ය සංවිධානයෙන් නිල වශයෙන් ඉවත් කරගත්තේ ය. ඇමෙරිකානු ජනාධිපතිවරයා ඒ බව මුලින්ම ප්‍රකාශ කළේ පසුගිය නොවැම්බර් මාසයේදී ය. නව කොරෝනා වයිරසය සම්බන්ධයෙන් ලෝක සෞඛ්‍ය සංවිධානය සත්‍ය වසන් කළ බවටත් එම සංවිධානය චීනයේ අතකොළුවක් වී ඇති බවටත් ඇමෙරිකානු ජනාධිපතිවරයා දිගින් දිගටම චෝදනා කළේය.

ඇමෙරිකාව ලෝක සෞඛ්‍ය සංවිධානයෙන් ඉවත් කරගැනීමේ ක්‍රියාවලියට වසරක් පමණ ගතවනු ඇතැයි පැවසේ.

දැනට කර ඇති මත විමසුම් හා සමීක්ෂණවලින් ජනාධිපති ට්‍රම්ප්ට වඩා ජෝ බයිඩන් සියයට 10කට වඩා වැඩි අගයකින් ඉදිරියෙන් සිටින්නේ යැයි වාර්තා වේ.

නව කොරෝනා වයිරසය පාලනය කිරීම සම්බන්ධයෙන් සහ ආර්ථික කඩා වැටීම යන කරුණු සම්බන්ධයෙන් ඇමෙරිකානුවන් බොහෝ දෙනකු විමසිල්ලෙන් පසුවන අතර එම කරුණු මුල් කරගනිමින් ඩොනල්ඩ් ට්‍රම්ප්ගේ ජනප්‍රියත්වය ද පහළ වැටී ඇත.

රොයිටර් සහ බී.බී.සී. ඇසුරිනි

055