පෙම්වතියට සීගිරිය ගැන වැරැදි අර්ථකතනයක් දුන් පෙම්වතකුට පිරිසක් ඉදිරියේ ලැජ්ජාවට පත්වීමට සිදුවූ අවස්ථාවක් සීගිරි කැටපත් පවුර ආසන්නයේදී දැක ගැනීමට හැකි විය. අවුරුදු 18-17 ක වයසේ පෙම් යුවළක් කැටපත් පවුරට පහළින් පිහිටි පඩිපෙළක වාඩි වී සිටි අතර තවත් බොහෝ පිරිසක් ඒ අසල සිරි නරඹමින් සිටියහ. පෙම්වතාගේ අතේ එල්ලී සිටි පෙම්වතිය සීගිරි ගලේ කැටපත් පවුරට දකුණු පසින් පිහිටි සීගිරි මාලිගාවේ ආරක්‍ෂක කුටි ලෙස සැලකෙන කුඩා කාමරවලට දැමූ අත්තිවාරම් පෙන්වා ඒ කුමක්දැයි විමසුවාය. ඒ අසල සිටි බොහෝ දෙනෙක් එම දෙබසට කන් දී සිටියහ. මඳක් ඉස්සී පහළ බැලූ පෙම්වතා ‘‘කාශ්‍යප රජතුමාගේ මාළු ටැංකි තිබුණු ස්ථානය මෙය බව” කීවේය. පෙම්වතිය එය පිළිගැනීමට හිස සොලවනවාත් සමග ඒ අසල සිටි අයෙක් ඉදිරියට ආවේය. මේ... දරුවෝ... ඔය ළමයි නොදන්නා දෙයක් තියෙනවානම් දන්න කෙනෙක්ගෙන් අහල දැනගන්න. ඔය ළමයි පාසලේදීවත් ඉගෙන ගෙන තියෙනවද මේ මාලිගාවේ නටබුන් අතර කාශ්‍යප රජතුමාගේ මාළු ටැංකි තිබුණා කියලා.’’ ඉතිහාසයට බොරු අර්ථකථන දීම හරි වැරැදියි. අනෙක් දේවල්වලට වගේම රටේ ඉතිහාසය ගැනත් අවබෝධයක් ලබාගත යුතුයි. අසල සිටි සැවොම එය අනුමත කළහ. මෙම දෙදෙනාට කරුණු පැහැදිලි කළ තැනැත්තා සීගිරිය පිළිබඳ කෙටි හැඳින්වීමක් කර සීගිරි ගලෙන් පහළට බැස ගියේය.