(ශාන්ත  ප්‍රදීප්  කුමාර කුලරත්න)

ඇඳිරිනීතිය පවතින අවස්ථාවේදී නීති විරෝධී ලෙස දුම්වැටි අලෙවි කළ ස්ථානයක් අද (31)සවස  වටලා එහි සිටි කාන්තාවක ඇතුළු 18 දෙනෙකු  අත් අඩංගුවට ගෙන අදාළ ස්ථානයට මුද්‍රා තැබීමට පියවර ගත් බව මත්තේගොඩ පොලිසිය පවසයි.

ඒ සමගම රුපියල් ලක්ෂ 70 කට අධික වටිනාකමින් යුත්  දුම්වැටි තොගයක් අලෙවි කළ බවට සැක කෙරෙන, දින රහිත බිල්පත් තොගයක් ද පොලිස් බාරයට ගෙන තිබේ.

ඇඳිරිනීතිය පවතින අවස්ථාවේ දී දුම්වැටි අලෙවි කරනා බවට කහතුඩුව සෞඛ්‍යය වෛද්‍ය නිලධාරී කාර්යාලයට ලද තොරතුරක් මත පොලීසිය හා එක්ව  මෙම වැටලීම සිදුකර තිබුණි.

මේ අතර ජනතාව එක්රැස් වීම වළක්වාලමින් රජය විසින් පනවා ඇති ඇඳිරි නීති කොන්දේසි උල්ලංඝනය කරමින්  නීති විරෝධී ලෙස දුම්වැටි අලෙවි කිරීම සම්බන්ධයෙන් එහි එම ස්ථානයේ හිමිකරු ඇතුළු පිරිසක් මෙසේ අත්අඩංගුවට පත්ව තිබේ. මෙම පුද්ගලයින් කැස්බෑව අධිකරණයට ඉදිරිපත් කිරීමට නියමිතය .