අජිත්ලාල් ශාන්තඋදය
 
රත්නපුර නගරයේ ඉස්ලාම් පල්ලියක 26 හැවිරිදි මවුලවිවරයෙක් මේ මස 15දා තෙක් රක්ෂිත බන්ධනාගාර ගත කරන ලෙස රත්නපුර මහේස්ත‍්‍රාත් ජනිතා රෝෂනී පෙරේරා මහත්මිය අද (3) නියෝග කළාය.

අයි.එස්.අයි.එස් ත‍්‍රස්තවාදීන්ගේ තොරතුරු ඇතුළත් පොත්පත් සහ පත‍්‍රිකා තම සහෝදරයාට ලබාදුන් සහ මරදානේදී තැනක සතියක පුහුණු පාඨමාලාවක් හදාරද්දී ඒවා ලබාගත් බවට තොතුරු හෙළිවීමෙන් පසුව ඔහුව සැකපිට අත්අඩංගුවට ගැණිනි. 

මෙසේ රක්ෂිත බන්ධනාගාර ගත කෙරුණේ මොහොමඩ් සකරියා මොහොමඩ් රිස්මි නැමැති 26 හැවිරිදි තැනැත්තෙකි. 

මොහු මීගමුව ප‍්‍රදේශයේ ස්ථිර පදිංචිකරුවෙක් බව සිදුකළ පරීක්ෂණ වලදී අනාවරණය වී තිබේ.

සැකකරුගේ වැඩිමහල් සහෝදරයා කොච්චිකඩේ ප‍්‍රදේශයේ දී අයි.එස්.අයි.එස් ත‍්‍රස්තවාදීන්ගේ තොරතුරු ඇතුළත් පොත්පත් සහ පත‍්‍රිකා සමඟ අත්අඩංගුවට ගෙන තිබේ. ප‍්‍රශ්න කිරීම්වලදී ඔහු පවසා තිබුණේ ඒවා තමන්ගේ මල්ලී වන සැකකරු විසින් තමන්ට ලබාදුන් බවයි.

ඒ අනුව කළ දැනුම්දීමක් මත රත්නපුර පොලීසියේ නීතිය බලගැන්වීමේ ඒකකයේ ස්ථානාධිපති පොලිස් පරීක්‍ෂක ලයනල් මහතා ඇතුළු කණඩායමක් විසින් සැකකරු අත්අඩංගුවට ගනු ලැබ ඇත.