(හර්ෂණ තුෂාර සිල්වා)

මේ සතියේ තෙවැනි දිනටත් කොළඹ කොටස් වෙළෙඳපොළ කටයුතු අද (13) මිනිත්තු තිහක කාලයක් සඳහා අත්හිටුවීය.

කොළඹ කොටස් වෙළෙඳපොළේ ‘එස්ඇන්ඩ්පී’ ශ්‍රී  ලංකා 20 මිල දර්ශකය සියයට 5කින් කඩා වැටීම හේතුවෙන් එලෙස වෙළෙඳපොළ ගනුදෙනු තාවකාලිකව නවතා දැමීණි.

‘එස්ඇන්ඩ්පී’ ශ්‍රී ලංකා 20 මිල දර්ශකය සියයට 5කින් පහළ යෑම නිසා ඉකුත් දා (10) සහ ඊයේ (12) මේ ආකාරයෙන්ම කොළඹ කොටස් වෙළෙඳපොළ කටයුතු මිනිත්තු 30කට අත්හිටුවීය.

ඊයේ දිනයේ ගනුදෙනු අවසන් වනවිට කොළඹ කොටස් වෙළෙඳපොළේ සියලු කොටස් මිල දර්ශකය සියයට 2.89කින් ද ‘එස්ඇන්ඩ්පී’ ශ්‍රී ලංකා 20 මිල දර්ශකය සියයට 3.82කින් ද පහළ ගියේය. ඒ අනුව සියලු කොටස් මිල දර්ශකය ඒකක 144.82කින් ද ‘එස්ඇන්ඩ්පී’ ශ්‍රී ලංකා 20 මිල දර්ශකය ඒකක 87.72 කින් ද පහළ ගියේය.

ඒ අනුව දිනය අවසානයේදී සියලු කොටස් මිල දර්ශකය අද ඒකක 4,874.73ක් ලෙස දැක්වුණු අතර ‘එස්ඇන්ඩ්පී’ ශ්‍රී ලංකා 20 මිල දර්ශකය ඒකක 2,205.97 ක් ලෙස දැක්විණි.

කොළඹ කොටස් වෙළෙඳපොළේ ප්‍රාග්ධනීකරණය ඊයේ රුපියල් බිලියන 2,269ක් ලෙස දැක්වුණු අතර ඊයේ එය රුපියල් බිලියන 2,333ක් ලෙස දැක්විණි.

අද වාර්තා වූ ගනුදෙනු පිරිවැටුම රුපියල් මිලියන 1,048ක් වූ අතර කොළඹ කොටස් වෙළෙඳපොළේ විදේශීය මිලදී ගැනීම් අද දිනයේදී රුපියල් මිලියන 174ක් ලෙස දැක්වුණු අතර විදේශීය විකුණුම් රුපියල් මිලියන 294ක් ලෙස දැක්විණි.

ලොව පුරා පැතිර යමින් තිබෙන කොරෝනා වයිරසයේ බලපෑම මෙන්ම ඒ හේතුවෙන් ගෝලීය මූල්‍ය වෙළෙඳපොළවලට සිදුව තිබෙන බලපෑම කොළඹ කොටස් වෙළෙඳපොළේ පහළ යෑමට ප්‍රධාන වශයෙන් හේතු වී ඇතැයි ආර්ථික විශේෂඥයෝ පවසති.

ශ්‍රී ලංකා මහ බැංකුව දෛනිකව නිකුත් කරන දත්තවලට අනුව බ්‍රිතාන්‍ය වෙළෙඳපොළේ බොරතෙල් බැරලයක මිල ඇමෙරිකානු ඩොලර් 34.44ක් ලෙස සටහන්ව තිබූ අතර ‘ඔපෙක්’ (තෙල් අපනයන කරන රටවල සංවිධානය) වෙළෙඳපොළේ තෙල් බැරලයක මිල ඇමෙරිකානු ඩොලර් 33.25ක් ලෙස සටහන්ව තිබිණි.