(ජයරත්න වික්‍රමාරච්චි සහ හිරාන් ප්‍රියංකර)

නීති විරෝධී ගිනි අවි 2ක් ඇතුළු උපකරණ තොගයක් සමග සැකකරුවන් සිව් දෙනකු තබ්බෝව අභයභූමියේ ස්ථාන දෙකකදී  අත් අඩංගුවට ගත් බව කරුවලගස්වැව වනජීවී අඩවි ආරක්ෂක කාර්යාලය කියයි.

තබ්බෝව අභයභූමියේ තුත්තනේරිය ප්‍රදේශයට අයත් කොටසේදී කැප් තුවක්කුවක් (වෙඩි බෙහෙත් කොටන තුවක්කුවක්) හා ඊයම් මූනිස්සන්, කැප්රෝල්, ගිනිපෙට්ටි ඇතුළු උපකරණ කිහිපයක් සමග සැකකරුවන් දෙදෙනකු සහ තබ්බෝව අභයභූමියේ එරමුදුගස්වැව ‍ප්‍රදේශයට අයත් කොටසේදී බෝර දොළහේ ගිනි අවියක්, එම ජීව පතරොම් 01ක්,විදුලිය පන්දම් 03ක්, බඳපටි 2ක් සමග සැකකරුවන් දෙනකුද මෙසේ අත් අඩංගුවට ගත් බවත් කරුවලගස්වැව වනජීවී කාර්යාලය පවසයි.

ඉකුත් 28 සහ 29 දිනවල මෙම වැටළීම් සිදුකර තිබේ.

මෙහිදී තුත්තනේරිය ප්‍රදේශයේදී අත් අඩංගුවට ගත් සැකකරුවන් දෙදෙනා වනාතවිල්ලුව මොරපතාන ප්‍රදේශයේ පදිංචිකරුවන් බවත්, තුත්තනේරිය ප්‍රදේශයේ තාවකාලිකව නැවතී නීතිවිරෝධීව හේන් වගාවන් සිදුකරගෙන යන බව කියන මොවුන් ඒ අතරතුර රක්ෂිතයේ වන සතුන්ද දඩයම් කරන බවට ද මූලික විමර්ශනවලදී අනාවරණය වූ බවත් වනජීවී කාර්යාලය පවසයි.

මේ අතර ගිනි අවියක් ඇතුළු උපකරණ සමග එරමුදුගස්වැව ප්‍රදේශයේදී අත් අඩංගුවට ගත් සැකකරුවන් දෙදෙනා කරුවලගස්වැව කුඩාමැදවච්චිය ප්‍රදේශයේ පදිංචිකරුවන් බවත් මොවුන්ද වන සතුන් දඩයම පිණිස අභයභූමියට ඇතුළු වී ඇති බවට එම විර්ශන වැඩිදුරටත් අනාවරණය කරන බවත් වනජීවී කාර්යාලය කියයි.