(හේමලතා ඩී හේවගේ)                                   

ගුවන් හමුදා සෙබළුන් ප්‍රවාහනය කරමින් සිටි බස් රථයක් හා ඇඟලුම් කම්හල් සේවිකාවන් ප්‍රවාහනය කරන බස් රථයක ගැටීමෙන් අද (16) සිදුවූ අනතුරකින් බස් රථයේ රියදුරු බරපතල තුවාල ලබා දඹදෙනිය මුලික රෝහලට ඇතුළත් කිරිමෙන් පසු මිය ගොස් ඇති බව පන්නල පොලිසිය පවසයි.

මෙලෙස අනතුරට ලක්ව ඇත්තේ කටුනායක ගුවන් හමුදා කඳවුරට තැපැල් ඡන්දය  ප්‍රකාශ කිරීමට ත්‍රිකුණාමල ගුවන් හමුදා කඳවුරේ සිට ගුවන් හමුදා සෙබළුන් ප්‍රවාහනය කරමින් සිටි බස් රථයකි.

අනතුරින් මියගොස් ඇත්තේ පන්නල දංගොල්ල ප්‍රදේශයේ පදිංචි කේ ජී ඇල්බට් නැමති 70 වියැති පුද්ගලයෙකි.

කුලියාපිටිය  දෙස සිට පැමිණි ඇඟඵම් කම්හල් සේවිකාවන් ප්‍රවාහනය කළ බස් රථය පන්නල නගර මධ්‍යයේ ඇති වටරවුමෙන් දංකොටුව දෙසට ධාවනය කරන අවස්ථාවේ මෙම අනතුර සිදුව තිබේ.

ගිරිඋල්ල දෙස සිට දංකොටුව දෙසට ධාවනයවූ  ගුවන් හමුදා භටයන් රැගත් බස් රථය අසල තිබූ කුඩා වෙළඳසැලක් කඩාගෙන ගොස් නතර වී ඇති බවත් කරන ලද මූලික පරීක්ෂණවලදී අනාවරණය වී ඇත.

ඇඟඵම් කම්හල් සේවිකාවන් ප්‍රවාහනය කළ බස් රථයේ රියදුරු බස්රථයෙන් එළියට විසිවීමත් සමඟ එම බස්රථය රියදුරෙකු නොමැතිව ධාවනය වී මාර්ගයේ ගමන්ගත් ටිපර් රථයක ද ගැටී ඇති බවත් අනතුරින් හමුදා සෙබඵන් කිසිවෙකුටත් තුවාල සිදුවී නොමැති  බවද පොලීසිය පවසයි.

සිද්ධිය සම්බන්ධයෙන් පන්නල පොලිසිය වැඩිදුර පරීක්ෂණ පවත්වයි.