මාර්තු 28 සිට අප්‍රේල් 5 දක්වා සතියක කාලයේදී නිවසට වී සිටින්නැයි ද එම සතිය වැඩ නොකරන සතියක් ලෙස ප්‍රකාශයට පත් කරන්නේ යැයි ද රුසියානු ජනාධිපති ව්ලැදිමීර් පුටින් පැවැසීය.
 
එම පියවර අනුව යමින් සෙනසුරාදා (28) සිට කඩ සාප්පු, අවන්හල්, උද්‍යානය ඇතුළු අත්‍යවශ්‍ය නොවන සේවා සියල්ල සතියක කාලයකට නවතා දමන බව මොස්කව් නගරාධිපති සර්ගේ සොබියාන්න කීය.
 
වයස අවුරුදු 65 වැඩි සියලු දෙනා අද (26) සිට නිවසේ රැඳී සිටිය යුතු යැයි ද මොස්කව් නගරාධිපතිවරයා නිවේදනය කළේය.
 
ගෝලීය වසංගතයක් බවට පත්ව තිබෙන නව කොරෝනා වයිරසය රට ව්‍යාප්ත වීම වැළැක්වීමේ අරමුණින් රුසියාව මේ වනවිට ක්‍රියාමාර්ග රැසක් ගෙන ඇති දැඩි නියෝග ද නිකුත් කර ඇත.
 
මොස්කව් නගරාධිපතිවරයාගේ මෙන්ම රුසියානු රජය නිකුත් කළ නියෝගවලට අනුව ආපනශාලාවලට ආහාර ඇණවුම් බාරගෙන ඒවා බෙදාහැරීමට අවසර ලබා දී ඇත.
 
අත්‍යවශ්‍ය නොවන බඩු භාණ්ඩ අලෙවි කරන කඩ සාප්පු සියල්ලම වසා දමන්නැයි ද මොස්කව් නගරාධිපතිවරයා නියෝග කර ඇත.
 
කොරෝනා වයිරසය හේතුවෙන් මොස්කව් අගනුවරින් මරණ දෙකක් වාර්තා වූ අතර රුසියාවේ නිල සංඛ්‍යා දත්තවලට අනුව එරටින් වාර්තා වන සමස්ත කොරෝනා ආසාදිතයන්ගේ ගණන 840කි.
 
ඒ.එෆ්.පී. 
 
055