ලක්‍ෂ 40 ක කහ - එනසාල් ගුවනින් ගෙනල්ලා

(යොහාන් භාසුර සහ ටී.කේ.ජී කපිල)

ඉන්දියාවේ කෙටි සංචාරයන් සඳහා ගොස් නැවත පැමිණි මගීන්ගේ ගමන් මලුවල සඟවා ගෙනආ වියලි කහ, එනසාල් සහ ඖෂධ ඇතුලු රුපියල් ලක්‍ෂ 40 ක පමණ වටිනා ආනයන සීමාවන් පනවා ඇති ද්‍රව්‍ය තොගයක් අත්අඩංගුවට ගැනීමට ශ්‍රී ලංකා රේගු කටුනායක ගුවන්තොටුවළ නිලධාරීහූ සමත් වූහ.

ඉන්දියාවේ චෙන්නායි සිට කටුනායක ජාත්‍යන්තර ගුවන් තොටුපලට ළඟාවූ ගුවන් යානයක මගීන් 29 දෙනකු පරීක්‍ෂා කිරීමේදී වියලි කහ කිලෝ 362 ක්, කහ කුඩු කිලෝ 110 ක්, එනසාල් කිලෝ 352 ක් සහ ඖෂධ විශාල ප්‍රමාණයක් අත්අඩංගුවට ගෙන රාජසන්තක කළ බවත් ශ්‍රී ලංකා රේගුව මත්ද්‍රව්‍ය පාලන අංශයේ නිලධාරීන් සහ ගුවන්තොටුපල පැමිණීමේ පර්යන්තයේ රේගු නිලධාරින් එකතුව මෙම මෙහෙයුම ක්‍රියාත්මක කළ බවත් රේගුව පවසයි.

ඉන්දියාවේ කෙටි සංචාරයක නිරත වූ බව හගවමින් , කොළඹ ප්‍රදේශයේ පදිංචි සුළු පරිමාණ ව්‍යාපාරිකයන් 30 දෙනකු පමණ මෙසේ ආනයන සීමාවන් පනවා ඇති භාණ්ඩ ගුවන් මගින් රැගෙන එමින් සිටියදී , කටුනායක ගුවන් තොටුපළ රේගු මත්ද්‍රව්‍ය පාලන අංශයේ නිලධාරීන් අත් අඩංගුවට ගෙන ඇති බව රේගු මාධ්‍ය ප්‍රකාශක , නියෝජ්‍ය රේගු අධ්‍යක්ෂ ( නීති කටයුතු ) සුදත්ත සිල්වා මහතා ප්‍රකාශ කළේය .

මෙම ව්‍යාපාරිකයන් පිරිස නිතර නිතර ඉන්දියාව සහ ශ්‍රී ලංකාව අතර ගුවන් ගමන් වල යෙදෙමින් මෙම නීතිවිරෝධී ව්‍යාපාරික කටයුතු වල නිරත වන බව , කාළයක සිට රේගු නිලධාරීන් සිදු කළ විමර්ශන වලදී අනාවරණය කර ගෙන තිබේ .

අදහස් (3)

ලක්‍ෂ 40 ක කහ - එනසාල් ගුවනින් ගෙනල්ලා

BRIBE ME YOU CAN DO ANYTHING Friday, 24 September 2021 08:59 AM

කාලයක සිට කරගෙන යනකොට රේගුව ට පෙනුනේ නැතිද ? කිලෝ 300-400 ක් සංචාරකයෙක් ගෙනෙද්දී. අනේ මන්ද. රේගුව කියනවා අපි අහනවා .

: 1 4

saliya Friday, 24 September 2021 09:00 AM

මේවා ගිනි තියෙනකන් නින්ද යන එකක් නැහැ. මේවා තමයි දැවෙන ප්‍රශ්න.

: 1 3

saku Friday, 24 September 2021 10:05 AM

දැන් වත් නීතිය ක්‍රියාත්මක වෙන හොදයි. චෙන්නායි ඉදල එනකොට ලංකාවේ කෙනෙක් කියන්ඩත් ලැජ්ජයි. හරියට පිටකොටුවේ බස් එකේ යනවා වගේ. ගුවන් සේවිකාවනුත් අකමැති ගුවන් ගමනක් තමයි මේ. මේ වගේ බොරුවට රට යන එකත්, ඩොලර් නිකන් නාස්ති කරන ව්‍යාපාරක් තමයි.

: 1 5