ලෙබනනයේ බීරූට් නගරයේ වරායේ සිදුවූ පිපිරීමෙන් තුවාල ලැබූ ශ්‍රී ලාංකිකයින් සංඛ්‍යාව 08 දෙනෙකු දක්වා ඉහළ ගොස් ඇතැයි ලෙබනනයේ ශ්‍රී ලංකා තානාපති කාර්යාලය සදහන් කර සිටී.

එම ලාංකිකයින්  පිරිස මේ වන විට රෝහල්ගතව ප්‍රතිකාර ලබමින් සිටින බවද එරට ශ්‍රී ලංකා තානාපති කාර්යාලය වැඩිදුරටත් සඳහන් කළේය.

අදාළ පිපිරීමෙන් බීරූට් අගනුවර වෙසෙන ශ්‍රී ලාංකිකයින් පිරිසකගේ නිවාසවලටද  ද හානි සිදුව ඇති බවට තොරතුරු ලැබී ඇතැයි ශ්‍රී ලංකා තානාපති කාර්යාලය සඳහන් කළේය.

පසුගිය 04 වැනිදා ලෙබනනයේ බීරූට් අගනුවර වරායේ ගබඩාවක තිබූ ඇමෝනියම් නයිට්රේට් ටොන් 2,750ක් පිපිරීමෙන්  පුද්ගලයින් 135 දෙනෙකු මියගොස් තවත් 4000කට ආසන්න පිරිසක් තුවාල ලබා සිටිති.

පිපිරීම හේතුවෙන් බීරූට් නුවර පිහිටි ශ්‍රී ලංකා තානාපති කාර්යාලයට සහ තානාපති කාර්යාල නිලධාරින්ගේ නිවාසවලට සුළු හානි සිදුවු අතර ඉන්  කිසිදු තානාපති කාර්යාල නිලධාරියකු තුවාල සිදු නොවූ බවද ශ්‍රී ලංකා තානාපති කාර්යාලය කියා සිටී.

ලෙබනනයේ ශ්‍රී ලාංකිකයින් 25,000ක් පමණ ජීවත් වන අතර බීරූට් නගරයේ වෙසෙන ශ්‍රී ලාංකිකයින් පිළිබඳ තොරතුරු බීරුට් නුවර පිහිටි ශ්‍රී ලංකා තානාපති කාර්යාලයේ 00961 5769585 යන දුරකථන අංකයෙන්  සහ [email protected] යන විද්‍යුත් තැපැල් ලිපිනය ඔස්සේ තොරතුරු ලබා ගත හැකි බවද එම තානාපති කාර්යාලය සදහන් කර සිටී.

(125)