(නාලක සංජීව දහනායක)
 
එක්සත් ජනතා නිදහස් සන්ධානය අයවැයට විරුද්ධව ඡන්දය දීමට තීරණය කර තිබියදී ශ්‍රී ලංකා නිදහස් පක්‍ෂය ඡන්දය වර්ජනය කිරීමෙන් පෙනී යන්නේ  වත්මන් ආණ්ඩුව ආරක්‍ෂා කිරීමට ඔවුන් තවදුරටත් සූදානමින් සිටින බව යැයි ශ්‍රී ලංකා පොදුජන පෙරමුණේ සභාපති මහාචාර්ය ජී.එල් පීරිස් මහතා අද (18) පැවැසීය.

ශ්‍රී ලංකා නිදහස් පක්‍ෂය මෙලෙස ප්‍රතිපත්ති වෙනස් කරන්නේ නම් එය ඉදිරියේදී පවත්වන සාකච්ඡාවලට බලපෑමක් එල්ලකරන බවද ඔහු කීය.

මහාචාර්ය ජී.එල් පීරිස් මහතා මෙසේද පැවැසීය.

'විදේශගතවන රණවිරුවන් ඒ රටවලදී අත්අඩංගුවට ගෙන නඩු පවරන ලෙසට එක්සත් ජාතීන්ගේ මානව හිමිකම් කොමසාරිස්වරිය විසින් ජීනීවා නුවර පැවැත්වෙන මානව හිමිකම් කවුන්සිලයට වාර්තාවක් ඉදිරිපත් කර තිබෙනවා. එම වාර්තාව අනුව රටවල් 17කට රණවිරුවන්ට ඇතුළුවීමට අවස්ථාවක් නැහැ'

ජිනීවා නුවර පැවැත්වෙන මානව හිමිකම් කවුන්සිලයට ඉදිරිපත් කර ඇති වාර්තාවේ සම්පූර්ණයෙන්ම පදනම් විරහිත කරුණු ඇතුළත්ව ඇතැයි සඳහන් කළ මහාචාර්යවරයා ඒ සම්බන්ධනයෙන් ඉතාම දුර්වල අනුවණ ක්‍රියාමාර්ගයන් ලංකා රජය අනුගමනය කරන බවද කීය.

බත්තරමුල්ල, නෙළුම් මාවතේ පිහිටි ශ්‍රී ලංකා පොදුජන පෙරමුණු පක්‍ෂ කාර්යාලයේ දී අද (18) පැවැති මාධ්‍ය හමුවකට එක්වෙමින් මන්ත්‍රීවරයා මේ බව සඳහන් කළේය.