(දිනේෂ් උපේන්ද්‍ර)                                                                                             
            
ත්‍රස්ත ප්‍රහාරයේ මහ මොළකරු වන සහරාන් හශීම් යන අය සමඟ ගනුදෙනු කළ බවට බුද්ධි අංශ විසින් තොරතුරු සනාථ කළ සැකකරුවකු කටුපොත පොලිසිය මගින් අත්අඩංගුවට ගෙන කුලියාපිටිය අධිකරණයට ඉදිරිපත්කිරීමෙන් අනතුරුව මැයි මස 8 දක්වා රක්‍ෂිත බන්ධනාගාර ගතකරන ලෙස කුලියාපිටිය මහේස්ත‍්‍රාත් ජනනි එස්. විජේතුංග මහත්මිය අද(30) නියම කළාය.
 
තවුහිද් ජමාත් සංවිධානයේ ප‍්‍රධාන පෙළේ සැකකරුවකු වන මොහු  අයි. එස්. අයි. එස්. සංවිධානය සමග සබඳතා පැවැත්වූ බවට බුද්ධි අංශ විසින් තොරතුරු අනාවරණය කරගෙන තිබිණි. 
 
එසේ රක්‍ෂිත බන්ධනාගාර ගත කරන ලද්දේ කටුපොත අලහේනේගම ගාල්ලේගම කැකුණගොල්ල ප‍්‍රදේශයේ පදිංචි 30 හැවිරිදි මොහොමඩ් ශාරුෆ් මොහොමඞ් මනාෆි නැමැත්තෙකි.
            
සැකකරු පිළිබඳව බුද්ධි අංශ වරින් වර විමර්ශන සිදුකරමින් කටුපොත පොලිසියට ලබාදී තිබූ තොරතුරු අනුව සැකකරුව අත්අඩංගුවට ගෙන තිබිණ.
            
කටුපොත පොලිස් ස්ථානාධිපති පොලිස් පරීක්‍ෂක පද්මසිරි මහතාගේ උපදෙස් මත පොලිස් සැරයන් හේරත් මහතා සැකකරු අධිකරණයට ඉදිරිපත්කොට කරුණු දැක්වීය.