(උණවටුන ඩී.ජී. සුගතපාල, අහංගම සුමතිපාල දියගහගේ)

අනාගතයේ දී අපේ රට ලෝක බලවතුන්ගේ යුද මධ්‍යස්ථානයක් බවට පත්වේද කියා  සැකයක් හා බියක් තියෙනවා.  යැයි හිටපු ජනාධිපති පාර්ලිමේන්තු මන්ත්‍රී මහින්ද රාජපක්ෂ මහතා පෙරේදා (02) රත්ගම දී පැවසීය.

ඔහු මේ බව කියා සිටියේ රත්ගම, මලවැස්සාගොඩ මහා මණ්ඩලාරාම පුරාණ විහාරයේ සාංචි තොරණ විවෘත කිරීම  බුදු පිළිමය නිරාවරණය කිරීම සහ නව ධාතු මන්දිරයට මුල්ගල් තැබීමේ උත්සවය නිමිත්තෙන් පැවති උත්සවයේ දී ය.  

 ඒ මහතා වැඩි දුරටත් මෙසේද පැවසීය.

“හම්බන්තොට වරාය ඉන්දියන් සාගරයේ වටිනාම  වරායක්. මධ්‍යස්ථානයක්. දැන් ජාත්‍යන්තරව තියෙන සීතල යුද්ධය ලංකාවේ මූලස්ථානය බවට පත්වේද කියලා අපට සැකයක් තියෙනවා. මේවා ගැන කවුරුවත් කථා කරන්නේ නැහැ. නිහඬවෙලා ඉන්නවා. හම්බන්තොට වරාය හම්බන්තොට දරුවන්ට පමණක් නෙවෙයි. මුළු රටේම දරුවන්ට අයිති සම්පතක්. වරාය, ගුවන්තොටුපොළ, අධිවේගි මාර්ගය දායාදයක්. හම්බන්තොට වරායට කීවා පිහිනුම් තටාකයක් කියලා. දැන් ඒක කෝටි ගණනකට විකුණනවා. මත්තල වී ගබඩා කළා. දැන් ඉන්දියාව හා ලෝකයේ රටවල් දඟලනවා මත්තල ගුවන් තොටුපොළ ගන්න. ගුවන්තොටුපොළ වී ගබඩා කළා. වී ගබඩාවක් බවට පත් කරලා බාල්දු කළා.

සැප්තැම්බර් 02 වැනිදා තමයි ශ්‍රි.ල.නි.පක්ෂය ගොඩනැගුණේ. බණ්ඩාරනායක මහත්තයා එක්ක ශ්‍රි.ල.නි.පක්ෂය ගොඩ නගන්න දකුණේ ඩී.ඒ. රාජපක්ෂ මහත්තයා එදාම ගියා. හබරාදුවේ ගුණසේකර මහත්තයාත් පසුව එක්වුණා. එහෙම හදපු ශ්‍රි.ල.නි පක්ෂයට අපිව අද එපා වෙලා. මට සම්මේලනයක් තියෙනවා කියලා 31 වැනිදා රාත්‍රී මට ආරාධනා කරලා තියෙනවා. මොහාන් මන්ත්‍රීතුමාට  ආරාධනාව හමුවෙලා තියෙන්නේ අද උදේ. අද උදේ එවනවා හෙට එන්න කියලා. අපට වැඩ නැති මිනිස්සු නේ. හදිසියේ ලියුමක් මතක්වෙලා එවනවා.

 ශ්‍රීලංකා නිදහස් පක්ෂයේ ස්වර්ණමය යුගය මා සභාපතිවරයාව සිටි යුගය කියලා කියන්න පුළුවන්.  ශ්‍රීලංකා නිදහස් පක්ෂයේ මන්ත්‍රීවරු 56යි හිටියේ චන්ද්‍රිකා මට පක්ෂය  භාරදෙන විට. මා  අපේ පක්ෂයේ පාර්ලිමේන්තු මන්ත්‍රීවරු සංඛ්‍යාව  127ක් දක්වා වැඩි කළා. පළාත් සභා සියල්ල  පාලනය කළේ අපේ පක්ෂය. පළාත් පාලන ආයතන සියයට 90ක් විතර පාලන බලය ලැබිලා තිබුණේ අපේ පක්ෂයට. එක තමයි ශ්‍රි.ල.නි.පක්ෂයේ  ශක්තිමත් යුගය. ඒ යුගය අද අමතක වෙලා.

අපට නොමිනේෂන් දෙන්නේ නැහැ කියනවා. එහෙම වූ විට අපටත් සිදුවෙනවා ජනතාවත් එක්ක දේශපාලනය කරන්න. ජනතාව අපිත් එක්ක ඉන්නකම් එක අපට ප්‍රශ්නයක් නෙවෙයි. මේ නිසා  වෙනත් දේශපාලන අලුත් දේශපාලන පක්ෂ බිහිවෙනවා. ශ්‍රීලංකා පොදු පෙරමුණ බිහිවෙලා තියෙනවා. පොදු පෙරමුණක් ගොඩනගන්න අපි කටයුතු කරමින් යනවා. එදත් අපි ඡන්ද ඉල්ලුවේ පොදු පෙරමුණෙන්.  අනාගතයේදිත් එකාබද්ධ විපක්ෂය  පොදු පෙරමුණ බොහොම පැහැදිලි ලෙස ශ්‍රි.ල.නි.පක්ෂය  එජාපයත් එක්ක ඉන්න තුරු මේ තත්ත්වය දිගින් දිගටම පවතිනවා කියන එක කියන්න ඕන. එක අපට ප්‍රශ්නයක් නෙවෙයි.

දෙදහස් පහේ සිට අපි හිටපු කාලය තුළ විහාරස්ථාන ගොඩ නගන්න උදවු කළා. අපි තරම් ආධාර කරපු යුගයක් තිබුණේ නැහැ. යුද්ධය පැවැති කාලයේදි හාමුදුරුවරු පිරිත් ගෙවල්වලට වඩින්න බයවුණා. අපි එවායින් බැට කැවා. යුද්ධයෙදී වැඩිම ආබාධිත රණවිරුවන් ඉන්නේ ගාල්ල දිස්ත්‍රික්කයේ රත්ගම ආසනයේ. ඔවුන් සටන් කළේ තමන්ගේ දේපළ ආරක්ෂාකර ගන්න නෙවෙයි. රට ත්‍රස්තවාදීන්ගෙන් මුදවාගන්න ඒකියභාවය නිදහස ආරක්ෂාකරගන්න. එහෙම තමන්ගේ ජීවිත පූජා කළ රණවිරුවන්ට තමයි එළවා එළවා පහර දෙන්නේ. වතුරවලින් හා බැටන් ප්‍රහාර වලින් රණවිරුවන්ට පහරදුන්නා. එදා ඇහැක් තුවාල කළා.

 සමහරු මහ ආඩම්බරයෙන් කියනවා අධිකරණයකදි මේ ගැන ඇසුවොත් මම ඇවිත් ඔක්කොම කියනවා කියලා.  බලන්න මොන තරම් නින්දිත ප්‍රකාශයක්ද කියලා. මේ විදියට පවා දෙන්න බැහැ හමුදා නායකයකුට. එහෙම කරන්න බැහැ. ලෝකයේ කොහේවත් එහෙම කරන්නේ නැහැ. එවැනි සමාජයක් තුළ තමයි අපි ඉන්නේ. රජයක් හා නායකයන් විසින් දිය යුතු ආදර්ශයක් තියෙනවා රටේ ජනතාවට දරුවන් ඒ දිහා බලාගෙන ඉන්නවා. කොල්ලකනවා වගේ මහ බැංකුව කොල්ල කෑවා.

 බස් එකේදී පික්පොකට් ගහන පික්පොකට් කාරයා අන්න හොරා කියලා කෑගහනවා. ඒ වගේ තමයි මේ ආණ්ඩුවත් අන්න හොරා අන්න හොරා කියමින් මේ අය හොරකම් කරනවා. මහ බැංකුවේ කොල්ලය දැන් එළියට ඇවිත් තියෙනවා. එකාබද්ධ විපක්ෂයේ මන්ත්‍රීවරු මේ ගැන ලොකු සටනක් කළා. විපක්ෂයේ මන්ත්‍රීවරු එකතුවුණා එහි එක ප්‍රතිඵලය තමයි කොමිසම. දැන් කොමිසමෙන් කරුණු හෙළිදරව් වෙනවා. ඇමැතිවරයකු ඉල්ලා අස්වෙනවා. ඇමැතිවරයකු හොරකම් කරලා ඉල්ලා අස්වුණා කියුවිට. එක නේ වුණේ. එතුමා ගැන මම කියන්න යන්නේ නැහැ. දෙවියන් කෝපවූ විට දේවියන්ගේ හාල් කැවුණු විට  වෙන වගේ වැඩක් තමයි මේ ආණ්ඩුවට වෙලා තියෙන්නේ. ඇමැතිවරු බැණ ගන්නවා. ඒ ඇමැති මේ ඇමැතිට බණිනවා. විශ්වාසභංග යෝජනාවක් ගේන බව කියනවා. හොරා කියනවා  නැව් ගිල්ල කියනවා. ආණ්ඩුව ඇතුළේ ගහ ගන්නවා.

අපේ ආණ්ඩුවට හොරු කියලා කිව්වට අපේ ආණ්ඩුවේ හොරු ටික තමයි දැන් ඒ පැත්තට ගිහින්  ඉන්නේ. එයාලා අපේ පැත්තේ ඉන්නකම් මුන් ඔක්කොම හොරු කියලා කීවා. දැන් ඒ පැත්තට ගිහින්  ඒකාබද්ධයට හොරු බව කියනවා. මේක තමයි  දේශපාලනයේ කැත. අපට බලය දෙන්නේ ජනතාවට යමක් කරන්න. මා කල්පනා කරන්නේ මම රටට යමක් කළාද කියලා. ඒ තුළින් තමයි දේශපාලනඥයින් තෘප්තිමත් වෙන්නේ.  අපට කියන්න පුළුවන් වසර 30 තිබූ යුද්ධය අවසන් කළා කියලා. ඒක අපට සතුටක්. ඒ සතුට ලබාගන්නේ අපි කරන සේවය අනුව. යුද්ධය අවසන් කිරිමෙන් අපි මහත් සේවයක් කළා කියලා හිතනවා.

අද මළකඳන් එන්නේ නැහැ. ජනතාවට බියෙන් සැකයෙන් තොරව ජනතාවට ගමන් බිමන් යන්න පුළුවන්. ඒ තත්ත්වයට රට පත් කළා. රට සංවර්ධන කළා. සියයට 98කට විදුලිය ලබාදීලා තියෙනවා. ජලය ලබාදුන්නා. රෝහල් ටික අලුතින් ඉදිකළා. පොලිස් ගොඩනැගිලි ඉදිවුණා. පාසල් ටික ගොඩනැගුවා. අලුත් විෂය ධාරාවක් හැදුවා. මහින්දෝදය විද්‍යාගාර ඉදිකළා. වසර දෙකහමාරක් ගියත් තවම මේ ආණ්ඩුවට බැරිවෙලා තියෙනවා ඒක විවෘත කරගන්න. අපේ ආණ්ඩුව වසරක් තුළ විද්‍යාගාර දහසක් හදනකොට මේ අයට අවුරුදු දෙකහමාරක් ගිහින් තවම බැරිවුණා මේ ටික  විවෘත කරගන්න.

 රාජ්‍ය ඇමතිවරයෙක් මා දැක්කා රූපවාහිනි වැඩසටහනක දී කියනවා අපි අනුන්ගේ ෆයිල් හොය හොයා යනවා මිසක් වැඩක් කරන්නේ නැහැ, මට නම් එපා වෙලා තියෙන්නේ කියලා. එහෙම කියලා අඬනවා. කවුරුහරි ගිහින්  සනසන්න එයා කියනවා අරූට හොරා කියනවා මිනීමරුව කියනවා  අපි වැඩක් කරන්නේ නැහැ කියලා කියනවා. එයා හඬ හඬා ඇත්ත කීවේ. ඒ අයගේ හදවතට දැනෙනවා අපි කරන්නේ බොරුවක් කියලා. මේ කට්ටිය කුළල් කාගෙන රටට සේවයක් කරන්නේ කොහොමද? දැන් ණය බර ගැන කථා කරනවා. අපි රට භාරගන්න විට මීට වඩා ණය බර තිබුණා. අපි ණය නොගෙව හිටියාද? හැම ආණ්ඩුවක්ම පසුගිය ආණ්ඩුවේ ණය ගෙවන්න ඕන. ඩඞ්ලිගේ කාලයේ ගත්තු ණය විතරක් නොවෙයි මහවැලිය හදන්න ගත්තු ණය පවා අපි ගෙව්වා. අපි හඬ හඬා හිටියේ නැහැ. අපි ගත්තු ණය අපට ගෙවන්න පුළුවන් කියලා අපි දන්නවා.

නමුත් මේ අය සංවර්ධනය නැවැත්තුවා. අපි ගත්තු ණය පාරේ ගියවිට පේනවා නේ. පාරවල් කාපට් කළා. වරායවල් හැදුවා.

මේ රට බලවතුන්ගේ යුද මධ්‍යස්ථානයක් බවට පත්වේද කියලා අපට සැකයක් තියෙනවා. අනාගතයේ දී  බයක් තියෙනවා. ඉන්දියන් සාගරයේ මේක වටිනාම වරායක් මධ්‍යස්ථානයක්. දැන් ජාත්‍යන්තරව තියෙන සීතල යුද්ධය ලංකාවේ මූලස්ථානය බවට පත්වේද කියලා සැකයක් තියෙනවා.  මේවා ගැන කවුරුවත් කථා කරන්නේ නැහැ. නිහඬවෙලා ඉන්නවා. හම්බන්තොට වරාය හම්බන්තොට දරුවන්ට පමණක් නොවෙයි මුළු රටේම දරුවන්ට අයිති සම්පතක්. වරාය ගුවන්තොටුපොළ අධිවේගි මාර්ගය දායාදයක්. අද හාමුදුරුවෝ කීවා කොළඹ ගිහින් අවශ්‍ය වැඩ ටික කරගෙන දවල්ට දානයට පන්සලට වඩින්න පුළුවන් කියලා. ඒක තමයි ඇත්ත. රටක් දියුණු කරන්න ඕන. ජාතියක් දියුණු වෙන්න ඕන.

 වෛද්‍ය විද්‍යාල  සිසුන් මහ පාරේ. ප්‍රශ්නයට විසඳුමක් දෙන්නේ නැහැ. දොස්තර මහත්වරු වැඩ වර්ජනයේ. දවස ගානේ කොළඹ නගරයේ පෙළපාළි. නායකයින් කියන්නේ මිනිසුන්ට අහුම්කන්දෙන්න ඕන, මේක කළ යුතුයි කියලා තමන්ගේ මතයේ එළඹගෙන ඉන්න ඕන නැහැ. අපට තමයි ඒකාධිපතියෝ කියලා කීවේ. එක කියලා දැන් බේරෙනවා. අද මහජන මතය තුට්ටුවකට ගණන් ගන්නේ නැති යුගයක් බවට පත්වෙලා තියෙනවා. බීරි අලින්ට විණා වයනවා වගේ වැඩක් තමයි මේ ආණ්ඩුවට ජනතාවගේ ප්‍රශ්න ගැන කථා කරන එක.”

 විහාරාධිපති දේවාලේගම පදුමවංශ හිමියන් අනුශාසනාවක් කළ අතර ගාල්ල දිස්ත්‍රික්  සන්ධාන මන්ත්‍රීවරුන් වන දොස්තර රමේෂ් පතිරණ, මොහාන් පිී. ද සිල්වා, දකුණු පළාත් සභා මන්ත්‍රී ආරියවංශ සම්මු යන මහත්වරු ද මෙහිදී කථා කළහ.