(අනීෂා මානගේ)

ආණ්ඩුව බලයට පත්වී තෙවැනි සංවත්සරය සැමරීමට උත්සාහ කරන්නේ මහින්ද රාජපක්ෂ මහතාගෙන් කට උත්තරයක් ලබා ගැනීමෙන් පසුව බව හම්බන්තොට දිස්ත්‍රීක් පාර්ලිමේන්තු මන්ත්‍රී ඩී.වී.චානක මහතා කියයි.

ඩී.වී.චානක මහතා මෙසේ පැවසූයේ අද (16) වීරකැටිය මැදමුලන ප්‍රදේශයේදී පැවැති ජනහමුවකට සහභාගී වීමෙන් අනතුරුව මාධ්‍යවේදීන් වෙත අදහස් ප්‍රකාශ කරමිනි.

වැඩිදුරටත් එහිදී අදහස් දැක්වූ මන්ත්‍රීවරයා මෙසේද පැවසුවේය.

   ‘‘මේ ආණ්ඩුව බලයට පත්වෙලා දැන් අවුරුදු තුනයි. ආණ්ඩුව දීපු පොරොන්දු දැන් එකින් එක බොදවෙලා යනවා. රටේ බදු බර වැඩි වෙලා. රටේ ජාතික සම්පත් විකුණනවා. හැබැයි මේ ඔක්කොම වහගන්න හදන්නේ රාජපක්ෂ පවුලෙන් පලිගැනීමෙන්.

ආණ්ඩුව බලයට පත්වෙලා දෙවැනි සංවත්සරය සැමරුවේ ශිරන්ති රාජපක්ෂ මැතිණියගෙන් කටඋත්තරයක් අරගෙන. දැන් තුන්වෙනි සංවත්සරය සමරන්න හදනවා මහින්ද රාජපක්ෂ මැතිතුමාගෙන් කටඋත්තරයක් අරගෙන.

දැන් අවුරුදු තුනක් තිස්සේ මේ බොරු නාඩගම කරා. මේ රගපෑම් කරා. මාධ්‍ය සංදර්ශන පැවැත්වූවා. හැබැයි අද මුළු රටේම අය දන්නවා රාජපක්ෂවරුන් හොරකම් කළේ නැහැ කියලා. රාජපක්ෂවරුන්ගෙන් කිසිම කරදරයක් කාටවත්ම වුණේ නැහැ කියලා. හැබැයි මේ අය කරන්නේ මාධ්‍ය සංදර්ශනයක් පැවැත්වීම පමණයි. ‘‘