(අනීෂා මානගේ)
නීති විරෝධී අන්දමින් ගල්කටස් වර්ගයේ ගිනි අවි බෙහෙත් කොටන තුවක්කු, කඩු ඇතුළු අවි ආයුධ  නිෂ්පාදනය කර අලෙවි කරන බව කියන කම්මලක් වටලා එම කම්මලේ සහායකවරයා අත්අඩංගුවට ගැනීමට අඟුණකොළපෑළැස්ස පොලිස් ස්ථානයේ නිලධාරීහු අද(15) සමත් වූහ.
 
මෙලෙස අත්අඩංගුවට පත්ව ඇත්තේ අඟුණකොළපෑලැස්ස උස්වැව ප්‍රදේශයේ පදිංචි 40 හැවිරිදි අයකු බව නිලධාරීහු කියති.මොහු කම්මලේ සහායකවරයා ලෙස සේවය කළ පුද්ගලයා බව පොලිසිය කියයි.

අඟුණකොළපෑළැස්ස උස්වැව මිලක්කතිස්ස ප්‍රදේශයේ පිහිටි කම්මලක් වටලා මෙම අවි ආයුධ සොයාගැනීමට නිලධාරීහු සමත්වූහ.

බෙහෙත් පුරවන ලද බෙහෙත් කොටන වර්ගයේ තුවක්කුවක්, බෙහෙත් පුරවන ලද බඳින තුවක්කු දෙකක්, බෝර දහසය පතුරොම් යොදන ගල්කටස් වර්ගයේ ගිනි අවියක්, බෝර දහසය වර්ගයේ ජීව පතුරොමක්, මරුවැල්වලට උපයෝගී කරගන්නා සිහින් කම්බි, අහස් කූරු, උණ්ඩ සකස් කිරීමට යොදාගන්නා ඊයම් කිලෝග්‍රෑම් 2ක් පමණ, කඩුවක්, ආයුධ නිශ්පාදනය කිරීමට යොදාගත් බව කියන උපකරණ රැසක් පොලිස් අත්අඩංගුවට ගෙන තිබිණි.

මෙම කම්මලේදී නිශ්පාදනය කරන අවි ආයුධ රුපියල් දහසත් දසදහසත් අතර මිලකට අලෙවි කර ඇති බවට තොරතුරු අනාවරණය කර ගත් බව පොලිසිය කියයි. මෙම අවි ආයුධ මිලදී ගත් පුද්ගලයන් සම්බන්ධයෙන්ද තොරතුරු අනාවරණය කරගෙන ඇති අතර එම පුද්ගලයන් සහ කම්මලේ හිමිකරු අත්අඩංගුවට ගැනීමට නිලධාරීහු පරීක්ෂණ සිදුකරති.