(රංජිත් රාජපක්ෂ)    
 
ශ්‍රී පාද වන්දනා සමයේදී එක්රැස් කරන ප්ලාස්ටික් වතුර බෝතල් ප්‍රතිචක්‍රීකරණයට මස්කෙළිය ප්‍රාදේශීය සභාව කටයුතු යොදා ඇතැයි ප්‍රාදේශීය සභාවේ නල්ලතන්නිය උප කාර්යාලයේ ස්ථානාධිපති බී. ඩබ්. හේමන්ත මහතා පැවසීය.
 
එම වතුර බෝතල් කොළඹ පිහිටි පෞද්ගලික ආයතන  වෙත ලබාදෙන බවත්, ඉන් දත්බුරුසු වැනි භාණ්ඩ නිපදවන බවත් ඒ මහතා වැඩිදුරටත් කීය.
 
මේ වසරේ ශ්‍රී පාද වන්දනා වාරය ආරම්භ වී මාසයක් වැනි කෙටි කාලයක් තුළ ප්ලාස්ටික් වතුර බෝතල් ලක්ෂයකට අධික ප්‍රමාණයක් මස්කෙළිය ප්‍රාදේශීය සභාව මගින් එක්රැස් කර ඇති බවද හේමන්ත මහතා කීය.
 
වන්දනාගරුවන්ට පොලිතින් උර භාවිතයෙන් වැළකී සිටින්නැයි දන්වා තිබූ බවත්, නල්ලතන්නියේ සිට ශ්‍රී පාද උඩමළුව දක්වා වන්දනාකරුවන් ගමන්ගන්නා මාර්ගයේ සවි කර ඇති කසළ බඳුන්වලට බැහැර කරන බවත් ඒ මහතා වැඩිදුරටත් සඳහන් කළේය.  වන්දනාකරුවන් සේම නල්ලතන්නියේ සංචාරක හෝටල්වලින් සහ ආපනශාලාවලින් බැහැර කරන වතුර බෝතල් ද මේ වෙනුවෙන් යොදාගන්නා බවත් හෙතෙම කීය.
 
නල්ලතන්නිය නගරයට සහ ශ්‍රී පාද මාර්ගයේ පිරිසිදු පානීය ජල යෝජනා ක්‍රමයක් ස්ථාපනය කරන්නේ නම් ශ්‍රී පාද පුද බිමේ  ප්ලාස්ටික් වතුර බෝතල් භාවිතය අවම කළ හැකි බව හේමන්ත මහතා සඳහන් කළේය.