අභ්‍යාවකාශ තරණයට න්‍යෂ්ඨික බලය යොදා ගැනිම කෙරෙහි නාසා ආයතනය අවධානය යොමුකැර ඇත. එම ආයතනය පවසන්නේ අඟහරුග්‍රහයා වෙත අනාගතයේ යවන රොකට්ටුවකට න්‍යෂ්ඨික බලය යොදා ගැනීමට දැනටමත් කටයුතු කරමින් සිටින බවයි.

විද්‍යාඥයන් පවසන්නේ සම්ප්‍රදායික රොකට්ටුවකට වඩා න්‍යෂ්ඨික බලය යොදා අභ්‍යාවකාශ ගත කරණ රොකට්ටුවක් බොහෝ සෙයින් වේගවත් වන බවයි. නාසා ඉංජිනේරුවන්ගේ සැලැස්ම වී ඇත්තේ මෙවැනි රොකට්ටුවක් යොදාගෙන 2033 දී අඟහරුවෙත ගගනගාමීන් යැවීමයි.

එවැනි රොකට්ටුවක බර ද සම්ප්‍රදායික රොකට්ටුවකට වඩා අඩුකරගත හැකි බවත් මේ හේතුවෙන් තෙරපුම් ශක්තිය වැඩිවන බවත් විද්‍යාඥයෝ කියති.

නාසා ආයතනයේ විද්‍යාඥයකුවන ආචාර්ය ස්ටැන්ලි බොරොව්ස්කි මේ රොකට්ටුව සැළසුම් කිරීමේ පුරෝගාමියාය. එය ඔහු විසින් කොපර්නිකස් ලෙස නම්කැර ඇත. ආචාර්ය බොරොව්ස්කි පවසන්නේ නව රොකට්ටුවේ භාණ්ඩ හා වාහන ගෙනයාමටත් කාර්ය මණ්ඩලයට යාමටත් වෙන වෙනම ස්ථාන සකසන බවයි. නාසා ආයතනය පවසන්නේ පෘථිවියේ සිට අඟහරුට ඇති සැතපුම් කෝටි හතරක දුර සම්පූර්ණ කිරීමට කොපර්නිකස් යානයට දින 100ක් ප්‍රමාණවත් වන බවයි. එසේ වුව ද කියුරියෝසිටි රොබෝ රෝවරය සහිත යානය අඟහරුවෙත යැවීමට දින 253ක කාලයක් ගතවූ බව ද නාසා ආයතනය කියයි. ඒ අනුව න්‍යෂ්ඨික බලය රොකට් තාක්ෂණයට යොදා ගැනීම පැරණි සම්ප්‍රදායික ක්‍රමයට වඩා දෙගුණයකටත් වැඩි කාර්යක්ෂමතාවක් ලබාගත හැකිවනු ඇතැයි විද්‍යාඥයෝ බලාපෙරොත්තු තබා සිටිති.