සෝල්හිදීය/රොයිටර් (රොයිටර්)

එක්සත් ජනපදය විශ්වාස කළ නොහැකි යැයි ඉරාන ජනාධිපති හසන් රොව්හානී උතුරු කොරියාවේ විදේශ අමාත්‍යවරයා හමුවෙමින් පවසා ඇතැයි ඉරාන රාජ්‍ය මාධ්‍ය වාර්තා කරයි. 

උතුරු කොරියානු විදේශ අමාත්‍ය රි යොන්ග් හෝ ඇමෙරිකා එක්සත් ජනපද සම්බාධක නොතකා ඉරානයේ සංචාරයක නිරත වී සිටි. ඇමෙරිකා එක්සත් ජනපද ජනාධිපති ඩොනල්ඞ් ට්‍රම්ප් අඟහරුවාදා (7) ඉරානයට නව සම්බාධක පැනවීමය.

වසර 2015 දී ‘ඉරාන න්‍යෂ්ටික ගිවිසුම’ අත්සන් කිරීමෙන් පසු ඉරානයට පනවා තිබූ සම්බාධක කිහිපයක් ඉවත් කිරීමට එවකට ඇමෙරිකා ජනාධිපති බැරැක් ඔබාමා පියවර ගත්තේය. එහෙත් ඉරානය න්‍යෂ්ටික ගිවිසුම උල්ලංඝනය කරන බවට චෝදනා කරමින් ජනාධිපති ඩොනල්ඞ් ට්‍රම්ප් ඇමෙරිකාව ඉරාන න්‍යෂ්ටික ගිවිසුමෙන් ඉවත් කරගත්තේය.

ඉන් අනතුරුව ඉරානයට නව සම්බාධක පැනවීමට ඇමෙරිකා ජනාධිපතිවරයා පියවර ගත් අතර ඉවත් කරන ලද සම්බාධක ද නැවත පැනවීය. 

ඉරානය සමඟ ගනුදෙනු කරන කිසිවකු  සමඟ තමන්ගේ ගනුදෙනුවක් නැතැයි ද සම්බාධක පැනවීමෙන් පසු ඇමෙරිකා ජනාධිපතිවරයා පැවැසීය. එවැනි තත්ත්වයක් මධ්‍යයේ උතුරු කොරියානු විදේශ අමාත්‍යවරයා මෙලෙස ඉරානයේ සංචාරයක නිරත වී සිටී. 

“ඇමෙරිකා එක්සත් ජනපදයේ මෑතකාලීන හැසිරීම බලද්දි ඇමෙරිකා එක්සත් ජනපදය විශ්වාස කළ නොහැකි රටක් බවට පත්වෙලා. පසුගිය කාලයේදී ඔවුන් ඔවුන්ගේ වගකීම් කිසිවක් ඉටු කළේ නැහැ” හසන් රොව්හානි උපුටා දක්වමින් ඉරානයේ අයි.ආර්.එන්.ඒ පුවත් සේවය වාර්තා කර තිබිණි. 

“වත්මන් වාතාවරණය තුළ මිත්‍ර රටවල් ජාත්‍යන්තර ප්‍රජාව තුළ සබඳතා සහ සහයෝගීතාව වර්ධනය කළ යුතුයි. එමෙන්ම බොහෝ ප්‍රශ්න සම්බන්ධයෙන් ඉරානයටත් උතුරු කොරියාවටත් තිබෙන්නේ එකම අදහසක්” යැයි ද හෙතෙම පවසා ඇත.   

ඉරානය සමඟ තිබෙන සබඳතා තවදුරටත් පුළුල් කරගැනීම තම උපායමාර්ගික ප්‍රතිපත්තිය යැයි එහිදි උතුරු කොරියානු විදේශ අමාත්‍යවරයා ප්‍රකාශ කර තිබේ. 

055