නැගෙනහිර ඇෆ්ගනිස්තානයේ ජලාලාබාද් ප‍්‍රදේශය  පෙරේදා (24) රික්ටර් පරිමාණයේ ප‍්‍රබලත්වය ඒකක 5.6ක් සටහන් කළ භූමිකම්පාවකින් කැළැඹී ගිය අතර ඉන් හත් දෙනෙක් ජීවිතක්ෂයට පත්වූහ. තුවාල ලැබූ ගණන 75කි.
මෙම භූමිකම්පාවේ ප‍්‍රබලත්වය ඇෆ්ගනිස්තානයේ කාබුල් නුවරට මෙන්ම අසල්වැසි පාකිස්තානයට ද දැනුණු බව මාධ්‍ය වාර්තා සඳහන් කරයි. 
පාකිස්තාන දේශ සීමාව ආසන්නයේ පිහිටි ජලාලාබාද් නුවරට වයඹ දිගින් පිහිටි ස්ථානයක කිලෝමීටර් 62 පොළොව අභ්‍යන්තරයේ භූමිකම්පාවේ අපිකේන්ද්‍රය පිහිටා ඇතැයි ඇමෙරිකා භූවිද්‍යා සමීක්ෂණ ආයතනය පවසයි.
මියගිය පුද්ගලයන් හය දෙනා නන්ගහාර් පළාතේ වැසියෝ වූහ. තුවාල ලැබූවන්ගෙන් හතළිස් දෙනකුගේ තත්ත්වය බරපතළ  නොවන බව ජලාලාබාද් ප‍්‍රකාශකයෙක් කීය.
භූමිකම්පාවෙන් විපතට පත් වූවන්ට සහන සැලසීම සඳහා ඇෆ්ගන් රජය පියවර ගෙන ඇති බව එරට ආපදා කළමනාකරණ දෙපාර්තමේන්තුව පැවැසීය.
ඇෆ්ගනිස්තානයේ හින්දුකූෂ් කඳුකරබද ප‍්‍රදේශයේ නිරතුරු භූමිකම්පා හට ගනී. ඉකුත් වසරේ මෙම ප‍්‍රදේශයේ හට ගත් භූමිකම්පා දෙකකින් 89 දෙනෙක් ජීවිතක්ෂයට පත් වූහ.