ඉස්ලාමීය සහයෝගිතා සමුළුව පෙරේදා (6) ඊජිප්තුවේ කයිරෝ නුවරදී ආරම්භ වූ අතර, ඊට සහභාගී වූ මුස්ලිම් රටවල නායකයන්ගේ වැඩි අවධානය යොමු වූයේ සිරියානු අර්බුදය කෙරෙහිය.
සමුළුව පැවැත් වූ කයිරෝ අගනුවරට විශේෂ පොලිස් සහ හමුදා ආරක්ෂාවක් ලබා දී තිබුණු බව ද වාර්තා විය. සමුළුවට සිරියානු කැරැලිකරුවන් සහ විපක්ෂ දේශපාලන කි‍්‍රයාකාරීන් නියෝජනය කරමින්, විපක්ෂ නායක මෝසා අල්කටීබ් සමුළුවට සහභාගී වූයේය.
වසර දෙකක් තිස්සේ දිග් ගැස්සෙමින් පවතින සිරියානු අර්බුදය විසඳීමට ඉරානය සමඟ සාකච්ඡා කිරීමට තමන් සූදානම් බවත්, සාකච්ඡා කර බලයෙන් ඉවත් වන්නේ නම් සජනපති බෂීර් අල් අසාද්ගේ ආරක්ෂාව ගැන වගබලා ගන්නා බවත් සිරියානු විපක්ෂ නායක අල්කටීබ් යළිත් වරක් අවධාරණය කළේය.
සිරියාවේ පවතින සිවිල් යුද්ධය හේතුවෙන් 67,000 කට වැඩි පිරිසක් ජීවත්ක්ෂයට පත්ව ඇතැයි එක්සත් ජාතීන්ගේ සංවිධානය පෙන්වා දෙයි.
ඉරාන ජනපති මොහොමඞ් අහමදිනෙජාද් ඊජිප්තුවට පැමිණියේ ඉකුත් පස් වැනිදාය. ඊජිප්තු ජනාධිපති මොර්සි විසින් ඔහු ඉමහත් හරසරින් පිළිගනු ලැබුණි. 1979 වසරේ පැවැති ඉස්ලාම් විප්ලවයෙන් පසු වසර 34 කට පසු ඊජිප්තුවට පැමිණි පළමු ඉරාන ජනපතිවරයා වන්නේ අහමදිනෙජාද්ය. 

සමුළුවට සහභාගි වු මුස්ලිම් රාජ්‍ය නායකයෝ