සිරියානු රජයේ හමුදාව කැරැුලිකරුවන්ගේ ප‍්‍රධාන බළකොටුව ලෙස සැලකෙන කුසයාර් නගරය අත්පත් කරගැනීමට  ඊයේ (20) දැවැන්ත මෙහෙයුමක් දියත් කළේය.
සිරියානු රජයේ පුවත් සේවා පැවැසුවේ රජයේ හමුදා සෙබළුන් 700 කට වැඩි පිරිසක් එම මෙහෙයුමට එක් ව සිටි බවය. ඔවුහු කැරැලිකරුවන්ට පහර දීමට ප‍්‍රහාරක හෙලිකොප්ටර් යානා සහ කෙටි දුර මිසයිල ද භාවිතා කළහ.
ඊයේ දිනයේ පමණක් කැරැලිකරුවන් 100 කට වැඩි පිරිසක් ප‍්‍රහාරවලින් ජීවිතක්ෂයට පත්වූයේ යැයි කැරැලිකරුවන් නියෝජනය කරන ඔවුන්ගේ දේශපාලන හඬ ලෙස සැළකෙන සිරියානු පාලක මණ්ඩලය පැවැසීය.
සිරියානු කැරැලිකරුවන් සහ විපක්ෂ දේශපාලන කණ්ඩායම් එක් වී පිහිටුවාගත් එම පාලක මණ්ඩලයට ඇමෙරිකාව ප‍්‍රමුඛ බටහිර සහාය හිමිවෙයි.  කුසයාර් නගරය අල්ලා ගැනීමට ලෙබනනයේ හිස්බුල්ලා සටන්කාමීන් ද සිරියානු රජයේ හමුදාව සමඟ එක් වී සිටි බවට කැරැලිකරුවෝ චෝදනා කරති.
හිස්බුල්ලා සංවිධානයට අයත් වන්නෝ ෂියා මුස්ලිම්වරුය. ලෙබනනය කේන්ද්‍රකොට ගත් එම සංවිධානය ඊශ‍්‍රායලයේ පරම සතුරා වන ඉරානයේ සමීප මිතුරෙකි.
හිස්බුල්ලා සංවිධානයට මූල්‍ය ආධාර ලැබෙන්නේ ඉරානයෙන් සහ සිරියාවෙනි. අසාද්ගේ රජය පෙරළීමට බටහිර බලවතුන්ට ඉඩ නොදෙන බව හිස්බුල්ලා සංවිධානය අවධාරණය කර ඇත්තේ ද ඒ නිසාය. හිස්බුල්ලා බටහිර විරෝධී ෂියා මුස්ලිම් සටන්කාමී සංවිධානයක් පමණක් නොව දේශපාලන පක්ෂයක් ද වෙයි. එය පිහිටුවූයේ 1985 දීය. එහි නායක හසන් නසරල්ලාය.  
‘හිස්බුල්ලා’ යන්නෙහි අර්ථය ‘දෙවියන්ට පක්ෂපාතී’ එසේත් නැතිනම් ‘දෙවියන්ගේ පක්ෂය’ යන්නය. ඇමෙරිකාව ප‍්‍රමුඛ පටහිර රටවල් හිස්බුල්ලා සංවිධානය ත‍්‍රස්ත සංවිධානයක් ලෙස නම් කර ඇත.
මේ අතර ආජන්ටිනා මාධ්‍යවේදීන් දෙදෙනකු සමඟ මාධ්‍ය සාකච්ඡාවකට එක් වෙමින් සිරියානු ජනාධිපති බෂීර් අල් අසාද් කියා සිටියේ තමන් බටහිර අනුග‍්‍රහය ලබන කිසිම සාම ගිවිමසුමකට සූදානම් නැති බවත් තමා බලයෙන් ඉවත් නොවන බවත්ය.