එවරස්ට් තරණය කිරීම සඳහා බලපත්‍ර නොමැති සංචාරකයන්ගේ කඳවුරු වසා දැමීමට චීනය පියවර ගෙන තිබේ.
 
කඳුනගින්නන් විසින් එවරස්ට් කඳුවැටිය සහ ඒ අවට ප්‍රදේශවල විශාල කසළ ප්‍රමාණයක් දමා ඒම මෙයට හේතු වී ඇත.
 
මේ අනුව සංචාරකයන්ට යා හැක්කේ කඳුවැටියේ ආශ්‍රම සහිත ප්‍රදේශය අසළට සහ කඳවුරුවලට මීටර් 5200ක්  පමණ දුර ප්‍රමාණයක් පමණි.
 
සංචාරකයන් නේපාලයේ දකුණු ප්‍රදේශයේ සිට එවරස්ට් වෙත පිවිසෙන අතර ටිබෙට්හි පිහිටා ඇති චීන සංචාරක කඳවුරට පහසුවෙන් ප්‍රවේශ විය හැකිවීම හේතුවෙන් ඔවුහු චීනයෙන්ද ඒ වෙත පැමිණෙති.
 
සංචාරකයන්ගේ පැමිණීමේ වර්ධනයත් සමග ‘ලොව විශාලතම කසළ කන්ද’ ලෙස හඳුන්වන එවරස්ට්හි කසළ ප්‍රශ්නය තවදුරටත් තීව්‍ර වී ඇතැයි බලධාරීහු පවසති.
 
මේ තත්ත්වය නිසා වසරකට එවරස්ට් තරණය කරන සංචාරකයන් ප්‍රමාණය 300 දක්වා සීමා කිරීමට ඉකුත් ජනවාරි මාසයේදී එරට බලධාරීහු තීරණය කළහ.
 
පසුගිය වසන්ත සෘතුවේදී එවරස්ට් කඳුවැටිය හා ඒ ආශ්‍රිත ප්‍රදේශය පිරිසිදු කිරීමේ මෙහෙයුම් 3ක් ක්‍රියාත්මක කළ බවද එහිදී ටොන් 8ක කසළ රැස් කළ බවද  කඳුවැටියෙහි ඇති එවරස්ට් තරණය කිරීමේදී මිය ගිය පුද්ගලයන්ගේ සිරුරු ගෙන ඒම සඳහා මෙහෙයුමක් ක්‍රියාත්මක කරන බවද ඔවුහු වැඩිදුරටත් කියා සිටිති.
 
 
(බී බී සී ඇසුරිනි)
 
16844