පාකිස්තාන ජනපති අසීෆ් අලී සර්දාරිට එරෙහිව ඇති දූෂණ නඩු විභාග යළි ආරම්භ කරන්නැයි ස්විට්සර්ලන්ත රජය පාකිස්තානයෙන් කරන ඉල්ලීම ඉවත් කර ගන්නැයි තමන් ස්විට්සර්ලන්ත බලධාරීන්ට ලිපියක් මගින් දැනුම් දීමට සූදානම් යැයි පාකිස්තාන නව අගමැති රාජා පර්වේස් අෂ්රෝෆ් ඊයේ (18) එරට ශ්‍රේෂ්ඨාධිකරණය හමුවේ පෙනී සිටි අවස්ථාවේදී කියා සිටියේය. රජයේ සහාය ඇතිව එම ලිපිය සකස් කරන බවත් එය කඩිනමින් ස්විට්සර්ලන්ත බලධාරීන්ට යැවීමට කටයුතු කරන බවත් අගමැතිවරයා ශ්‍රේෂ්ඨාධිකරණය හමුවේ වැඩිදුරටත් කියා සිටියේය. විනිසුරු අසීෆ් සහීඞ් කෝසා කියා සිටියේ ජනපති අසීෆ් අලී සර්දාරි සම්බන්ධ අර්බුදය කඩිනමින් විසඳා ගත යුතු බවය. ස්විට්සර්ලන්ත බලධාරීන්ට යැවීමට සූදානම් එම ලිපිය අධිකරණයට ඉදිරිපත් කරන ලෙසට ද විනිසුරුවරයා නියෝග කළ අතර අධිකරණයේ කටයුතු ලබන 25 වැනිදාට කල් දැමුණි. අගමැති අෂ්රෝෆ්ට පෙර එම ධුරයේ කටයුතු කළ රාසා ගිලානිට අගමැති ධුරය අහිමි වූයේ, ජනපති සර්දාරිට එරෙහිව ස්විට්සර්ලන්ත රජය කරන චෝදනා සම්බන්ධයෙන් නිහඬව සිටීම මගින් පාකිස්තාන ශ්‍රේෂ්ඨාධිකරණයට අපහාස කළේ යැයි යන චෝදනාවට වරදකරු වීමෙනි. ජනපති සර්දාරි සම්බන්ධයෙන් හටගෙන ඇති එම අර්බුදයට ස්ථිර විසඳුමක් ලබා දීමට අගමැති අෂ්රෝෆ්ට නොහැකි වුවහොත් ගිලානිට සිදුවූවාක් මෙන් අධිකරණයට අපහාස කළේ යැයි චෝදනාවට වරදකරු වී අගමැති ධුරය අහිමි වනු ඇත.