ෆේස්බුක් සමාගම විසින් පසුගිය මාස හයක කාලය තුළ ව්‍යාජ ගිණුම් බිලියන 3.2ක් ඉවත් කළ බව එම සමාගම නිකුත් කළ නවතම වාර්තාවේ දැක්වේ.

2018 වසරේ අප්‍රේල් සිට සැප්තැම්බර් දක්වා කාලය තුළ ඉවත් කරන ලද ව්‍යාජ ගිණුම් සංඛ්‍යාවට වඩා මෙම වසරේ ඉවත් කළ සංඛ්‍යාව දෙගුණයකටත් වඩා වැඩි බවද ඔවුහු සඳහන් කරති.

එසේම ළමා අපයෝජන සහ සියදිවි නසාගැනීම් නිරූපණය කරන පළ කිරීම් මිලියන ගණනක් ද ඉවත් කර ඇත.

සමාගම වැඩිදුරටත් සඳහන් කරන්නේ මත්ද්‍රව්‍ය අලෙවියට සම්බන්ධ පළකිරීම් මිලියන 4.4ක් ද ඉවත් කළ බවයි.

සමාජ ජාලයේ ක්‍රියාකාරී පරිශීලකයෙකු විමට අවස්ථාවක් ලැබීමට පෙර ව්‍යාජ ගිණුම් සියල්ලම පාහේ හඳුනා ගන්නා බවත් පරිශීලක ගිණුම් වලින් 5%ක් පමණ ව්‍යාජ ඒවා බවත් ෆේස්බුක් සමාගම පවසයි.

වෛරී ප්‍රකාශ, ළමා නිරුවත, නීති විරෝධී ගිනි අවි සහ අන්තවාදී අන්තර්ගතයන් බොහොමයක් ද ඉවත් කර ඇත.
 
(රොයිටර් පුවත් ඇසුරිණි - 085)