පාකිස්තාන ජනාධිපති අසීෆ් අලී සර්දාරිට එරෙහිව නඩු පැවැරීමට අපොහොසත්වූ එරට නව අගමැති රාජා පර්වේස් අෂ්රෆ් හට මේ මස අගදී අධිකරණය හමුවේ පෙනී සිටින්නැයි ඊයේ(8) ශ්‍රේෂ්ඨාධිකරණය නියෝග කළේය. ජනාධිපති සර්දාරිට එරෙහිව ඇති දූෂණ නඩු විභාගය යළි ආරම්භ කරන්නැයි ස්විට්සර්ලන්ත රජයට දැනුම් දෙන ලෙස එරට ශ්‍රේෂ්ඨාධිකරණය අගමැති පර්වේස්ට අගෝස්තු 8 වැනිදා දක්වා කල් ලබා දී තිබිණ. අනතුරුව අද වනතෙක් එම නියෝගය අනුව කටයුතු කිරීමට අගමැතිවරයා අපොහොසත් වීම  හේතුවෙන් මේ මස 27 වැනිදා අධිකරණය හමුවේ පෙනී සිටින ලෙස ශ්‍රේෂ්ඨාධිකරණය අගමැති පර්වේස්ට නියෝග කර ඇත. පර්වේස්ට පෙර අගමැති ධුරයේ සිටි යූසොෆ් රාසා ගිලානිට ධුරය අහිමි වූයේ ද ශ්‍රේෂ්ඨාධිකරණය දුන් එම නියෝගයට අනුව කටයුතු කිරීමට ඔහු අපොහොසත් වූ නිසාය. එම නිසා ඔහු ශ්‍රේෂ්ඨාධිකරණයට අපහාස කළේ යැයි වරදකරුවකු වූ අතර ඉන්පසු අගමැති ධුරය ද ඔහුට අහිමි විය. නව අගමැති ලෙස පර්වේස් ශ්‍රේෂ්ඨාධිකරණයේ තීන්දුවට අනුව කටයුතු නොකළහොත් ඔහුට ද අගමැති ධුරය අහිමි වීමේ අවදානමක් ඇතැයි පාකිස්තාන දේශපාලන විචාරකයෝ පෙන්වා දෙති. ඉකුත් මාසයේදී අගමැතිවරයා ශ්‍රේෂ්ඨාධිකරණයට දන්වා සිටියේ පාකිස්තාන ජනාධිපති සර්දාරිට එරෙහිව නඩු පැවැරිය හැක්කේ ඔහු ජනාධිපති ධූරයෙන් ඉවත්ව ගියහොත් පමණක් බවත් ජනපති ධූරයේ රැඳී සිටිද්දී ඔහුට එරෙහිව නීති මඟින් කටයුතු කිරීමට නොහැකි බවත්ය.