ඉන්දුනීසියාවට 2004 වසරේදී කඩා වැදුණු මහා සුනාමියට හසුවී මුහුදට ගසාගෙන ගොස් පණ බේරා ගත් දැරියක, සුනාමි ව්‍යසනයෙන් සත් වසරකට පසු යළි ඇගේ මාපියන් සොයා ගැනීමට සමත් වූවාය. 15 වියෙහි පසුවන මේරී යුරන්ඩා නැමැති එම දැරිය සුනාමියට ගසාගෙන යද්දී ඇයගේ වයස අවුරුදු 8 කි. එම අවස්ථාවේදී වාසනාවකට මෙන් දිවි බේරා ගත් ඇය, මාපියන්ගෙන් වෙන්වූ අතර වෙනත් කාන්තාවක ඇය දරුකමට ගෙන ඇත. එම කාන්තාව තමා හිඟමනේ යෙදවූ බව මේරී යුරන්ඩා පවසයි. ඇයගෙන් බේරී පැනගොස් තමා පදිංචිව සිටි මෙලාබෝ නමැති ගම්මානයට පැමිණීමට මේරී යුරන්ඩාට හැකියාව ලැබී ඇති අතර පසුගිය සතිඅන්තයේදී ඇය යළිත් මාපියන් සොයා ගැනීමට සමත්වූවාය. ”ලැබුණු විස්තර අනුව මා මගේ අම්මා තාත්තා සොයා ගෙන ආවා. හුඟක් අය මට උදව් කළා. වසර හතකට පස්සේ මට මගේ අම්මා යළි දකින්න ලැබුණා. ඇයට මුලදී මාව හඳුනා ගන්න බැරිවුණත් ඇය මගේ අම්මා බව මා ඇය දුටු ගමන්ම දැනගත්තා” යැයි මේරී යුරන්ඩා පවසයි. 2004 වසරේ දෙසැම්බර් 26 වැනිදා හටගත් සුනාමියෙන් ඉන්දුනීසියාවට පමණක් නොව ශ්‍රී ලංකාවට ද මහා විනාශයක් සිදුවිය. සුනාමියට හසුවීමෙන් මියගිය ගණන 230,000 කට වැඩිය. සුනාමියෙන් වැඩිපුරම බලපෑම් එල්ල වූයේ ඉන්දුනීසියාවටය. සුනාමිය හටගත්තේ ඉන්දුනීසියාව අසල මුහුදු පතුළේ හටගත් රික්ටර් මාපකයේ ඒකක 9.1 ක ප‍්‍රබලත්වයක් සටහන් කළ භූමි කම්පාවක් හේතුවෙනි.