පසුගිය වසරේ මෙරට ඇඟලු‍ම් අපනයන ආදායම 2023 වසර සාපේක්ෂව සියයට 5 කින් ඇමෙරිකානු ඩොලර් බිලියන 4.76 දක්වා වර්ධනය වී ඇතැයි මෙරට ඒකාබද්ධ ඇඟලු‍ම් සංගම් සංසදය විසින් නිකුත් කරන ලද තාවකාලික දත්ත වාර්තාවේ දැක්වේ.

ශ්‍රී ලංකාව ඇමෙරිකාවට සිදුකළ ඇඟලු‍ම් අපනයනය 2023 වසරට සාපේක්ෂව පසුගිය වසරේදී සමස්තයක් ලෙස සියයට 5.23 කින් වර්ධනය වී ඉන් ලැබූ ආදායම ඇමෙරිකානු ඩොලර් බිලියන 1.9 ක් දක්වා ඉහළ ගොස් ඇති බවත් එක්සත් රාජධානිය හැර යුරෝපයට සිදුකළ ඇඟලු‍ම් අපනයනය සියයට 0.81 කින් වර්ධනය වී ඉන් ලැබූ අදායම ඩොලර් බිලියන 1.4 දක්වා ඉහළ ගොස් ඇති බවත් එම දත්ත වාර්තාවේ සඳහන් වේ.

එසේම ශ්‍රී ලංකාව එක්සත් රාජධානියට සිදුකළ ඇඟලු‍ම් අපනයන 2023 වසරට සාපේක්ෂව පසුගිය වසරේදී සියයට 7.65 ප්‍රතිශතයකින් වර්ධනය වෙමින් ඉන් ලැබූ ආදායම ඩොලර් මිලියන 675 දක්වා ඉහළ ගොස් ඇති බවද එම දත්ත වාර්තාවල දැක්වේ. ඉහත රටවල් හැර අනෙක් රටවල්වලට සිදුකළ අපනයනද 2023 වසරට සාපේක්ෂව පසුගිය වසරේදී සියයට 10.13 කින් වර්ධනය වෙමින් ඉන් ලැබූ අදායම ඩොලර් මිලියන 778.4 දක්වා ඉහළ ගොස් ඇති බවද ඒකාබද්ධ ඇඟලු‍ම් සංගම් සංසදය නිකුත් කළ දත්ත වාර්තාවේ සඳහන් වේ.

ශ්‍රී ලංකාවේ ඇඟලු‍ම් අපනයන ආදායම 2022 වසරේදී ඩොලර් බිලියන 5.6 ක් ලෙසත්, 2020 වසරේදී ඩොලර් බිලියන 5 ක් ලෙසත්, 2019 වසරේදී ඩොලර් බිලියන 5.3 ක් ලෙසත් සඳහන් විය. 2023 වසරට සාපේක්ෂව පසුගිය වසරේදී මෙරට ඇඟලු‍ම් අපනයන ආදායම වර්ධනයක් පෙන්නුම් කළත් 2022 වසර සාපේක්ෂව එය පහළ යෑමකි.

පසුගිය දෙසැම්බර් මාසයේදී 2023 වසරේ එම කාල සීමාවට සාපේක්ෂව ඇඟලු‍ම් අපනයන ආදායම සියයට 2 කින් වර්ධනය වී ඉන් ලැබූ ආදායම ඩොලර් මිලියන 424 දක්වා ඉහළ ගොස් ඇතත් ඇමෙරිකාවට කළ අපනයනයන සියයට 4 කින් පහළ යමින් ඉන් ලැබූ ආදායම ඩොලර් මිලියන 424 දක්වාද, එක්සත් රාජධානියට කළ අපනයනයන් සියයට 10 කින් පහළ යමින් ඉන් ලැබූ ආදායම ඩොලර් මිලියන 49 දක්වාද අඩුවී ඇත.