• සියයට 5.87 ක වර්ධනයක්
• මාර්තුවේදී මුළු අපනයන ආදායම ඩො. බිලියන 1.5 ක්
• පළමු කාර්තුවේදී ඉපැයූ සමස්ත වෙළෙඳ භාණ්ඩ අපනයන ආදායම ඩො. බි. 3.32 ක්
• මාර්තුවේ වෙළෙඳ භාණ්ඩ අපනයන ආදායම ඩො. බි.1.21 ක්
• සේවා අපනයන අංශයෙන් ඉපැයූ ආදායම ඩො. මි. 887.04 ක්
• රෙදිපිළි සහ ඇඟලු‍ම් අපනයන ආදායම ඩො. බි. 1.38ක්.සියයට 11.09 ක වර්ධනයක්
• වැඩිම ප්‍රතිශතයකින් අපනයන ආදායම ඉහළ ගොස් ඇත්තේ කුළුබඩු සහ සාන්ද්‍රිත නිෂ්පාදනවල. එම අගය සියයට 71.43 ක්

විමුක්ති එස් රුද්‍රිගු

අපනයන අංශයේ කැපී පෙනෙන වර්ධනයක් පෙන්නුම් කරමින් මෙම වසරේ පළමු කාර්තුවේදී ශ්‍රී ලංකාව ඉපැයූ මුළු අපනයන ආදායම ඇමෙරිකානු ඩොලර් බිලියන 4.2 ක් බවත් එය පසුගිය වසරේ පළමු කාර්තුව සමග සංසන්දනය කරන විට සියයට 5.87 ක වර්ධනයක් බවත් ශ්‍රී ලංකා අපනයන සංවර්ධන මණ්ඩලය ප්‍රකාශ කළේය. පසුගිය වසරේ පළමු කාර්තුවේදී තුළදී ශ්‍රී ලංකාව ඉපැයූ මුළු අපනයන ආදායම ඇමෙරිකානු ඩොලර් බිලියන 3.97 ක් බවද ශ්‍රී ලංකා අපනයන සංවර්ධන මණ්ඩලය සඳහන් කළේය.

වෙළෙඳ සහ සේවා අංශවල අපනයන ආදායමද ඇතුළත්ව පසුගිය මාර්තු මාසයේදී මෙරට මුළු අපනයන ආදායම ඇමෙරිකානු ඩොලර් බිලියන 1.5 ක් ලෙස සටහන් වූ බවත් එය පසුගිය වසරේ මාර්තු මාසයට සාපේක්ෂව සියයට 6.24 ක සැලකිය යුතු ආකර්ෂණීය ඉහළ යාමක් බවත් ශ්‍රී ලංකා අපනයන සංවර්ධන මණ්ඩලය ප්‍රකාශ කළේය. පසුගිය වසරේ මාර්තු මාසයේදී මෙරට මුළු අපනයන ආදායම ඇමෙරිකානු ඩොලර් බිලියන 1.41 ක් විය. පසුගිය පෙබරවාරි මාසය සමග මාර්තු මාසයේ අපනයන ආදායම සංසන්දනය කරන විට එය සියයට 11.76 ක ඉහළ වර්ධනයක් බවද එම මණ්ඩලය පැවැසුවේය.

මෙම වසරේ පළමු කාර්තුවේදී ශ්‍රී ලංකාව ඉපැයූ සමස්ත වෙළෙඳ භාණ්ඩ අපනය ආදායම ඇමෙරිකානු ඩොලර් බිලියන 3.32 ක් බවත් එය පසුගිය වසරේ පළමු කාර්තුවට සාපේක්ෂව සියයට 4.61 ක වර්ධනයක් බවත් ශ්‍රී ලංකා අපනයන සංවර්ධන මණ්ඩලය ප්‍රකාශ කළේය. පසුගිය වසරේ පළමු කාර්තුව තුළ මෙරට සමස්ත වෙළෙඳ භාණ්ඩ අපනය ආදායම ඇමෙරිකානු ඩොලර් බිලියන 3.17 ක් ලෙස සටහන් වූ බවද එම මණ්ඩලය පැවැසුවේය.

ශ්‍රී ලංකා රේගු දෙපාර්තමේන්තුව නිකුත් කළ තාවකාලික දත්තවලට අනුව පසුගිය මාර්තු මාසයේ වෙළෙඳ භාණ්ඩ අපනයන ආදායම ඇමෙරිකානු ඩොලර් බිලියන 1.21 ක් බවත් එය පසුගිය වසරේ මාර්තු මාසයට සාපේක්ෂව සියයට 5.87 ක් වර්ධනයක් බවත් ශ්‍රී ලංකා අපනයන සංවර්ධන මණ්ඩලය ප්‍රකාශ කළේය. පසුගිය වසරේ මාර්තු මාසයේදී මෙරට වෙළෙඳ භාණ්ඩ අපනයන ආදායම ඇමෙරිකානු ඩොලර් බිලියන 1.14 ක් ලෙස සටහන් වූ බවද එම මණ්ඩලය පැවැසුවේය.

මෙම වසරේ පළමු කාර්තුවේදී සේවා අපනයන අංශය කැපී පෙනෙන වර්ධනයක් පෙන්නුම් කර ඇති බවත් පළමු කාර්තුව තුළදී ශ්‍රී ලංකාව සේවා අපනයන අංශයෙන් ඉපැයූ ආදායම ඇමෙරිකානු ඩොලර් මිලියන 887.04 ක් බවත් ශ්‍රී ලංකා අපනයන සංවර්ධන මණ්ඩලය පැවැසුවේය. එය පසුගිය වසරේ පළමු කාර්තුවට සාපේක්ෂව සියයට 10.88 ක ඉහළ යාමක් බවද එම මණ්ඩලය ප්‍රකාශ කළේය.

එසේම පසුගිය මාර්තු මාසයේදී මෙරට අපනයන ආදායම ඇමෙරිකානු ඩොලර් මිලියන 291.12 ක් බවත් එය පසුගිය වසරේ මාර්තු මාසයට සාපේක්ෂව සියයට 7.7 ක ඉහළ යාමක් බවත් ශ්‍රී ලංකා අපනයන සංවර්ධන මණ්ඩලය පැවැසුවේය. 

පසුගිය වසරේ පළමු කාර්තුවේදී මෙරට රෙදිපිළි සහ ඇඟලු‍ම් අපනයන ආදායම ඇමෙරිකානු ඩොලර් බිලියන 1.24ක් ලෙස සටහන් වූ බවත් එය මෙම වසරේදී ඇමෙරිකානු ඩොලර් බිලියන 1.38ක් දක්වා ඉහළ ගොස් ඇති බවත් එම මණ්ඩලය ප්‍රකාශ කළේය. එය ප්‍රතිශතයක් ලෙස සියයට 11.09 ක වර්ධනයකි.

මෙම වසරේ මාර්තු මාසයේ රෙදිපිළි සහ ඇඟලු‍ම් අපනයන ආදායම ඇමෙරිකානු ඩොලර් මිලියන 495.95 ක් බවත් එය පසුගිය වසරේ මාර්තු මාසය සමග සංසන්දනය කරන විට සියයට 11.73 ක ඉහළ යාමක් බවත් ශ්‍රී ලංකා අපනයන සංවර්ධන මණ්ඩලය පැවැසුවේය. පසුගිය මාර්තු මාසයේදී රෙදිපිළි සහ ඇඟලු‍ම් අපනයන ආදායම ඇමෙරිකානු ඩොලර් මිලියන 443.90 ක් විය.

පළමු කාර්තුවේදී පසුගිය වසරට සාපේක්ෂව වැඩිම ප්‍රතිශතයකින් අපනයන ආදායම ඉහළ ගොස් ඇත්තේ කුළුබඩු සහ සාන්ද්‍රිත නිෂ්පාදනවල බවත් එය ප්‍රතිශතයක් ලෙස සියයට 71.43 ක් බවත් ශ්‍රී ලංකා අපනයන සංවර්ධන මණ්ඩලය ප්‍රකාශ කළේය. එසේම පළමු කාර්තුවේ අඩුම ප්‍රතිශතයකින් අපනයන ආදායම ඉහළ ගොස් ඇත්තේ තේ වල බවත් එය ප්‍රතිශතයක් ලෙස සියයට 4.56 ක් බවත් එම මණ්ඩලය පැවැසුවේය.

කෙසේ නමුත් දියමන්ති,මැණික් හා ස්වර්ණාභරණ මෙන්ම රබර් ආශ්‍රිත නිෂ්පාදන, ඉලෙක්ට්‍රොනික සහ ඉලෙක්ට්‍රොනික සංරචක, මුහුදු ආහාර, විසිතුරු මසුන්, එළවළු, පළතුරු, වෙනත් අපනයන බෝග, මල් හා ශාකපත්‍ර, බෝට්ටු නිෂ්පාදන සහ ඛනිජ තෙල් නිෂ්පාදනවල අපනයන ආදායම පළමු කාර්තුවේදී පසුගිය වසරේ පළමු කාර්තුවට සාපේක්ෂව පහළ ගොස් ඇති බවද ශ්‍රී ලංකා අපනයන සංවර්ධන මණ්ඩලය ප්‍රකාශ කළේය.

මෙම වසරේ මුල් කාර්තුවේදී මෙරට ඉහළම අපනයන ගමනාන්ත අතර මුල් ස්ථාන තුනේ පසුවන්නේ ඇමෙරිකාව, බ්‍රිතාන්‍ය සහ ඉන්දියාව බව ශ්‍රී ලංකා අපනයන සංවර්ධන මණ්ඩලය සඳහන් කළේය.

අපනයන කේෂ්ත්‍රයේ ශ්‍රී ලංකාව ලබාගෙන ඇති ධනාත්මක ප්‍රගතිය පිළිබඳව අදහස් දක්වමින් අපනයන සංවර්ධන මණ්ඩලයේ සභාපති සහ ප්‍රධාන විධායක නිලධාරී මංගල විජේසිංහ මහතා ප්‍රකාශ කර සිටියේ ගෝලීය වෙළඳාම තුළ ශ්‍රී ලංකාවේ වර්ධනය වන ප්‍රමුඛතාව අවධාරණය කරන බවත් එය රටේ අපනයන තරඟකාරිත්වය සහ වෙළෙඳපොළ ප්‍රවේශය වැඩි දියුණු කිරීම සඳහා අඛණ්ඩව දරණ උත්සාහයේ ඵලදායීතාව පිළිබිඹු කරන බවත්ය.