භානුක අමරසිංහ 

මෙරට ප්‍රමුඛතම ආයෝජන කළමනාකරණ බැංකුවක් වන ඇක්විටි පාර්ට්නර්ස් (Acuity Partners)   පෞද්ගලික සමාගමේ ඉතිරි සියයට 50ක කොටස් හිමිකාරීත්වයත් අත්පත් කරගත් බව හැටන් නැෂනල් බැංකුව පවසයි. 
මෙම ඇක්විටි පාර්ට්නර්ස් පෞද්ගලික සමාගම හැටන් නැෂනල් බැංකුව සහ DFCC  බැංකුව එකාබද්ධ හවුල්කාරීත්වයෙන් පිහිටුවාගත් සමාගමකි.

DFCC  බැංකුව සතුව තිබූ මෙම කොටස් හිමිකාරීත්වය අතපත්කරගැනීම සඳහා ශ්‍රී ලංකා සුරැකුම්පත් හා විනිමය කොමිෂන් සභාව මගින් ලබාදුන් අනුමැතියෙන් අනතුරුව මෙම අත්පත් කරගැනීම සිදුව තිබේ. 

මෙහිදී DFCC  බැංකුව සතුව තිබූ ඇක්විටි පාර්ට්නර්ස්හි කොටස් මිලියන 75.5ක ප්‍රමාණයක් අත්පත් කරගත් බවත්, මෙම ගනුදෙනුවේ වටිනාකම රුපියල් බිලියන 6.5ක් බවත් හැටන් නැෂනල් බැංකුව සඳහන් කරයි. 

මෙම ගනුදෙනුව පිළිබඳව පළමුවරට අනාවරණය කෙරුණේ පසුගිය 2024 වසරේ ජූනි මාසයේදීය. එහිදී රුපියල් බිලියන 7කට මෙම කොටස් අලෙවිය සිදු කිරිම සැලසුම විය. එහෙත් නොවැම්බර් මාසයේදී මෙම දෙපාර්ශවයම අදාළ ගනුදෙනුව අත්හැරීමට පියවර ගත්තේය. කෙසේ වෙතත් දෙසැම්බර මාසයේදී නිවේදන නිකුත් කළ එම බැංකු දෙකම සිය වගන්ති සහ කොන්දේසි වෙනස් කරමින් මෙම එකඟතාව පිළිබඳ සාකච්ඡා පවත්වාගෙන යන බව සඳහන් කළේය.