ණය ගෙවීමට රජයේ වියදම් පියවීමට අවශ්‍ය මුදල දළදේශිය නිෂ්පාදිතයෙන් සියයට 24 ක්
මෙම වසරේ සියයට 3ක වර්ධනයක්
මහ බැංකුවේ උපකල්පනය සියයට 3.5 ත් 4ත් අතර වර්ධනයක්
වසරේ මුල් දින 29ට සියයට 1.8 කින් රුපියල අවප්‍රමාණය වෙලා
ඩොලර් බිලියනයක ආනයන වියදම පහසුවෙන් කළමනාකරණය කළ හැකියි
ආදායම් ඉහළ නොයාම උද්ධමනයේ අඩුවීම නොදැනීමට හේතුවක්

විමුක්ති එස් රුද්‍රිගු

ණය තිරසරභාවය ඇති කර ගැනීම සඳහා රජයේ වියදම් පියවා ගැනීමට සහ ණය ගෙවීමට අවශ්‍ය මුළු මුදල (දළ මූල්‍ය අවශ්‍යතාව) මෙරට දළ දේශීය නිෂ්පාදිතයෙන් සියයට 13 ක මට්ටම දක්වා පහළට ගෙන ආ යුතු බව ජාත්‍යන්තර මූල්‍ය අරමුදලේ ණය තිරසරභාවය පිළිබඳ විශ්ලේෂණයේ කැපවීමක් ලෙස සඳහන් වන බවත්, වත්මන් ආර්ථික ප්‍රවණතාව මත 2027 වසර වන විට රජයේ දළ මූල්‍ය අවශ්‍යතාව සියයට 12.7 දක්වා පහළට ගෙන ඒමට හැකියාව තිබෙන බවත් මහ බැංකු අධිපති ආචාර්ය නන්දලාල් වීරසිංහ මහතා ඊයේ (29) ප්‍රකාශ කළේය.
වර්තමානයේ ණය තිරසරභාවය ඇති කර ගැනීම සඳහා රජයේ වියදම් පියවා ගැනීමට සහ ණය ගෙවීමට අවශ්‍ය මුළු මුදල මෙරට දළ දේශීය නිෂ්පාදිතයෙන් සියයට 24 ක් වුවත් 2027 වසර වන විට එම ඉලක්කය ළඟාකර ගත හැකි බවද ඔහු පැවැසුවේය.
එසේම ශ්‍රී ලංකාවේ ආර්ථිකය 2024 වසරේදී සියයට 5.2 කින් ධනාත්මක ලෙස වර්ධනය වී ඇති බව මහ බැංකුව පුරෝකථනය කර ඇති බව ශ්‍රී ලංකා මහ බැංකු අධිපති ආචාර්ය නන්දලාල් වීරසිංහ මහතා පැවැසුවේය.
ජාත්‍යන්තර මූල්‍ය අරමුදල මෙරට ආර්ථිකය මෙම වසරේදී සියයට 3 කින් ධනාත්මක ලෙස වර්ධනය වනු ඇතැයි පුරෝකථනය කර තිබෙන බවත් වත්මන් ආර්ථික ප්‍රවණතා පිළිබඳ සැලකිල්ලට ගැනීමේදී එම ඉලක්කය පහසුවෙන් පසුකර යාමට හැකිවනු ඇතැයි විශ්වාස කරන බවත් ආචාර්ය නන්දලාල් වීරසිංහ මහතා පැවැසුවේය.
මෙරට ආර්ථික වර්ධනය පිළිබඳව 2025 වසරේ එක් කර්තුවකවත් දත්ත නොමැතිව මහ බැංකුවට පුරෝකථනයක් ඉදිරිපත් කළ නොහැකි බවත්, වත්මන් ආර්ථික ප්‍රවණතා අනුව 2025 වසරේදී මෙරට ආර්ථික වර්ධන වේගය සියයට 3.5 ත් 4 ත් අතර වනු ඇතැයි උපකල්පනයක් කළ හැකි බවත් මහ බැංකු අධිපතිවරයා ප්‍රකාශ කළේය.
පසුගිය වසරේ ලොව ශක්තිමත් මුදල් ඒකකයක් වූ ශ්‍රී ලංකා රුපියල මෙම වසරේ පළමු දින 29 තුළ ඩොලරයට සාපේක්ෂව සියයට 1.8 කින් අවප්‍රමාණය වෙමින් දුර්වලම මුදල් ඒකකය බවට පත්වී තිබෙන බවට පළවී තිබූ මාධ්‍ය වාර්තා තමන් දුටු බවත්, සාධක වශයෙන් ගත්කල එය නිවැරදි වුවත්, අර්ථකතන ලබා දීමේදී ඉතාමත් සැලකිලිමත් විය යුතු බවත් මහ බැංකු අධිපති ආචාර්ය නන්දලාල් වීරසිංහ මහතා සඳහන් කළේය.
විනිමය අනුපාත තීරණය වන්නේ ඉල්ලු‍ම හා සැපයුම මත බවත්, මේ වනවිට ඩොලරයක් ශ්‍රී ලංකා රුපියල් 370 සිට රුපියල් 301 දක්වා පහත වැටී තිබීම රුපියල අවප්‍රමාණය වීමට හේතු වූ එක් කරුණක් බවත්, දෙවැනි කරුණ ආනයන ඉල්ලු‍ම ඉහළ යනවිට ඒ හා බැඳුනු යම්යම් සාධකද ඉහළ යන බව වීරසිංහ මහතා ප්‍රකාශ කළේය. මහා බැංකුවේ ප්‍රතිපත්තිය නම් විනිමය අනුපාත වෙළඳපොළ තීරණය වීමට ඉඩ හැරීම බවත්, අවශ්‍ය වුවහොත් ඊට මහ බැංකුව මැදිහත් වන බවත් මහ බැංකු අධිපතිවරයා පැවැසුවේය.
ඉන්දියාවේ සහ චීනයේ මුදල් ඒකක දෙස බැලු‍වහොත් ඩොලරයට සාපේක්ෂව ඉතිහාසයේ වාර්තා වූ වැඩිම අවප්‍රමාණය එම මුදල් ඒකක වාර්තා කර තිබෙන බවත්, එම රටවල ආර්ථික ලොව ප්‍රමුඛ පෙළේ ආර්ථික අතර තිබෙන බවත් වීරසිංහ මහතා ප්‍රකාශ කළේය. ඉන්දියාවට ඩොලර් බිලියන 640 ක නිල සංචිත තිබෙන බවත්, චීනයට ඩොලර් ට්‍රිලියන 3.2 නිල සංචිත තිබෙන බවත් වීරසිංහ මහතා පැවැසුවේය.
 වාහන ආනයනට පනවා ඇති සීමා අදියර 3 යටතේ ඉවත් කිරීමට නියමිත බවත්, ඉන් අදියර දෙකක් ප්‍රකාශයට පත් කර තිබෙන බවත් ඔහු ප්‍රකාශ කළේය. අවසන් අදියර ඉදිරියේදී ප්‍රකාශයට පත් කරනු ඇති බවද ඔහු පැවැසුවේය. ඇමෙරිකානු ඩොලර් බිලියනයක පමණ ආනයන ඉතාමත් පහසුවෙන් කළමනාකරණය කිරීමට හැකියාව පවතින බව රජයට මහ බැංකුව දැනුම් දී තිබෙන බවද මහ බැංකු අධිපතිවරයා ප්‍රකාශ කළේය.
උද්ධමනය ඉහළ යන විට බඩු මිල ඉහළ ගියත්, උද්ධමනය පහළ යන ඉවට බඩු මිල පහළ නොයන බවත්, ඉන් සිදුවන්නේ වැඩි වූ බඩු තවත් ඉහළ යාම නතර වීම බවත් මහ බැංකු අධිපතිවරයා පැවැසුවේය. උද්ධමනය ඉහළ ගිය පමණින් ජනතාවගේ ආදායමද ඉහළ නොයන බැවින් උද්ධමනය පහළ යෑම ජනතාවට නොදැනෙන බවද ඔහු ප්‍රකාශ කළේය.