කෙසෙල් ගෙඩි පිරිසුදු කරමින්

• අතුරු නිෂ්පාදනවලටත් ජාත්‍යන්තර වෙළෙඳපොළේ ඉහළ ඉල්ලුමක් 
• කාබනික කෙසෙල් වගාවෙන් ඩොලර් වැඩි ප්‍රමාණයක් උපයන්න පුළුවන්
• කර්මාන්තයක් ලෙස කිරීම රැකියා උත්පාදනයටත් ග්‍රාමීය ආර්ථිකයටත් ශක්තියක්
• අපනයනයට කෙසෙල් ලබාදෙන ගොවීන් 35ක් විතර කලින් සිටියත් දැන් ඉන්නේ විස්සක් පමණ 
• මාසයකට කිලෝ 25 000ක් 60 000ක් පමණ අපනයනය කරන්න පුළුවන්
• වතුර ප්‍රශ්නය වගාවට බාධාවක් 
• අස්වනු ප්‍රවාහනයෙදී අබලන් මාර්ග තවත් ප්‍රශ්නයක් 

මහව - සජීවා කෝට්ටගොඩ

කෙසෙල් වගාව, ශ්‍රී ලංකාවේ ගොවියාට ආර්ථික වාසි සැලසෙන වගාවකි. ලංකාවේ විවිධ ප්‍රදේශවල කෙසෙල් වගාව කරන අතර යම් යම් කාලවලදි මූල්‍යමය වාසි සැලසෙන අයුරු දක්නට ලැබේ. මහ පොළොවේ රස සාරය උරා ගනිමින් විවිධ රස වර්ග ඔස්සේ විවිධ නම්වලින් කෙසෙල් වර්ගද හඳුන්වා දී තිබේ. 

ඉන් අපනයනය සඳහා වඩාත්ම යොමුව ඇති කෙසෙල් වර්ගය වන්නේ කැවෙන්ඩිස් කෙසෙල්ය. මෙය ඩොලර් උපයන උල්පතක් ලෙස හැඳින්විය හැකිය.

ජාත්‍යන්තර වෙළෙඳපොළ ඉල්ලු‍මේදී කැවෙන්ඩිස් කෙසෙල් ලෝකයේ වඩාත්ම ජනප්‍රිය කෙසෙල් ප්‍රභේදයකි.

එය නැවුම් පලතුරක් ලෙස මෙන්ම සැකසූ ආහාරවල අමුද්‍රව්‍යයක් ලෙසද ජාත්‍යන්තර වෙළෙඳපොළේ ඉහළ ඉල්ලු‍මක් පවතී.

මෙම ඉල්ලු‍ම නිසා අපනයනය සඳහා අවස්ථා රැසක් නිර්මාණය වීම වගාකරුවන්ට මෙන්ම ව්‍යාපාරිකයන්ටද වටී. කෙසෙල්වලට දිගු ආයු කාලයක් ඇති බැවින්, ඒවා විදේශ රටවලට අපනයනය කිරීමට පහසුය.

ශ්‍රී ලංකාව වැනි රටවලින් කැවෙන්ඩිස් කෙසෙල් අපනයනය කිරීමෙන් විශාල වශයෙන් විදේශ විනිමය උපයා ගත හැකිය.

කෙසෙල්වලින් අතුරු නිෂ්පාදන ලෙස කෙසෙල් චිප්ස්, කෙසෙල් පිටි සහ කෙසෙල් බීම වැනි විවිධ සැකසූ නිෂ්පාදන නිපදවිය හැකිය. මෙම නිෂ්පාදනවලට විදේශීය වෙළෙඳපොළවල ඉහළ ඉල්ලු‍මක් ඇති අතර, ඒවා අපනයනය කිරීමෙන් ගොවියාට අත මිට සරුකරගත හැකිය.

විශේෂයෙන් කාබනික වගාවකට සමාන නිසා කාබනික කැවෙන්ඩිස් කෙසෙල් සඳහා ලෝක වෙළෙඳපොළේ ඉහළ ඉල්ලු‍මක් පවතී. කාබනික කෙසෙල් වගා කර අපනයනය කිරීමෙන් වැඩි ඩොලර් ප්‍රමාණයක් උපයා ගත හැකිය. මෙහිදී කර්මාන්තයක් ලෙස බොහෝ රැකියා උත්පාදන වීමක් දැකිය හැකිය.

වගාව, අස්වනු නෙළීම, ඇසුරුම් කිරීම සහ බෙදා හැරීම යන ක්‍රියාවලදී බොහෝ රැකියා අවස්ථා උත්පාදනයවේ. එය රටේ ආර්ථිකයට සහ ග්‍රාමීය සංවර්ධනයට දායකත්වයක් සපයයි.

කෙසෙල් වගාව සාර්ථකව කිරීමට නම්, ගුණාත්මක බවින් ඉහළ නිෂ්පාදන කිරීම, ජාත්‍යන්තර ප්‍රමිතිවලට අනුකූලව නිෂ්පාදන කිරීම, නිසි අලෙවිකරණ ක්‍රමවේද භාවිත කිරීම සහ රජයේ සහයෝගය ඉතා වැදගත් වේ.
කෙසෙල් අපනයනය කිරීමෙන් ශ්‍රී ලංකාවට ජාත්‍යන්තර වෙළෙඳපොළේ තරගකාරීත්වය වැඩිදියුණු කළ හැකිය. අනෙකුත් කෘෂිකාර්මික නිෂ්පාදන සඳහා ද වෙළෙඳපොළ අවස්ථා විවෘත කිරීමට උපකාරී වේ. කෙසෙල් කර්මාන්තය වර්ධනය වනවා සේම ආර්ථික වර්ධනයට දායක වීමද සිදු වේ.

මෙම වාසිදායක තත්වය උපරිම කර ගැනීම සඳහා, උසස් වගා ක්‍රම භාවිත කිරීම, ගුණාත්මක නිෂ්පාදන නිපදවීම සහ ඵලදායී අලෙවිකරණ උපාය මාර්ග අනුගමනය කිරීම වැදගත් වේ.

වාණිජමය අරමුණු මුල්කරගෙන කරන කෙසෙල් වගා ක්‍රමයකි. මෙහිදී ප්‍රධාන වශයෙන් කැවෙන්ඩිස් කෙසෙල් ප්‍රභේදය තෝරාගනු ලබන අතර, එමඟින් වැඩි අස්වැන්නක් ලබාගත හැකිය.

භූමිය තෝරා ගැනීම, ජලය, හිරු එළිය, සුළඟ, පැළ, රෝගවලින් ආරක්ෂාවීම, පටක රෝපණ ක්‍රම වැනි දෑ කෙරෙහි අවධානය යොමුකළ යුතුය.

කැවෙන්ඩිස් කෙසෙල් අපනයනකරුවකු වන සමන්ත ප්‍රේමචන්ද්‍ර මහතා මෙසේ අදහස් දැක්වීය.

අපනයනය සඳහා කෙසෙල් ලබා දෙන ගොවියන් 35 ක් විතර කලින් සිටියා. දැන් 20 ක් විතර ඉන්නවා. ඒකට හේතුව වන්නේ විශාල ලාබයක් ලැබුණහම ගොවියන් වෙනත් වැඩ කටයුතුවල නිරත වෙනවා. බොහෝ අවස්ථාවල වාහන මිලදී ගැනීම සහ ගෙවල් අලු‍ත් වැඩියා වැනි කටයුතු සිදු කිරීම නිසා ගොවියන්ගේ අවධානය වගා වෙත යොමු නොවීම නිසා හොඳ අස්වැන්නක් ලබා ගැනීමට නොහැකි වෙනවා. අපනයනය සඳහා යැවීමට හොඳ කෙසෙල් තියෙන්න ඕනා.

මාසෙකට කිලෝ 25,000 - 50,000-60,000 වැනි ප්‍රමාණවලින් අපනයනය කරන්න පුළුවන් වෙනවා. මේ නිසා රටට ඩොලර් ගේන්න දායකත්වය දක්වන්න පුළුවන් වුණා. මේ දිනවල අස්වැන්න අඩු මට්ටමක් තියෙනවා. ඉතා හොඳ ඉහළ ආදායමක් ගන්න පුළුවන්.

කෙසෙල් වගාවේදී ගොවීන්ට ගැටලු‍ කිහිපයකට මුහුණදීමට සිදුවෙනවා. මගේ කෙසෙල් පැළ 7000 ක් පමණ තියෙනවා. වතුර ප්‍රශ්නය නිසා වතුර මැෂිමට ඩීසල් සඳහා විශාල වියදමක් යනවා. විදුලි පද්ධතිය ලබා ගැනීමේ හැකියාවක් ඇත්තෙත් නැහැ.

අධික උෂ්ණත්වය, නියඟය සහ අධික වර්ෂාපතනය කෙසෙල් වගාවට බලපානවා. ඒ හේතුවෙන් අස්වැන්න අඩු වීම සහ ගුණාත්මක භාවය පහත වැටීම සිදුවෙන්න පුළුවන්. කෙසෙල් වගාවට නිසි ජල කළමනාකරණයක් අවශ්‍ය වෙනවා.

වැව්වල වතුර තිබුණත් ගොවි සංවිධාන වලින් දෙන්න කැමැති නෑ. මාර්ග කැඩී තිබීම් නිසා අස්වැන්න රැගෙන ඒමේදී ගැටලු‍ මතු වෙනවා. අස්වෙන්න නෙලා කෙටි කාලයක් ඇතුළත ඇසුරුම් කිරීමේ ස්ථානයට රැගෙන යා යුතු වෙනවා. මාර්ගවල අබලන් තත්වය නිසා එසේ යාමේදී වාහනවලට බලපෑම් ඇති වෙනවා. රජය හෝ මාර්ග පිළිසකර කර දෙන්නේ නම් අපිට හැකි අයුරින් මේ වගාව වැඩිදියුණකර රටට ඩොලර් ගේන්න පුළුවන්.
කෙසෙල් ගෙඩිවලට පහසුවෙන් හානි විය හැකි බැවින්, අස්වැන්න නෙළීම සහ ප්‍රවාහනය පරෙස්සමෙන් කළ යුතුය.

කෙසෙල් වගාව සඳහා වැඩි ශ්‍රමයක් අවශ්‍ය වෙනවා. කෙසෙල් ගෙඩි නිසි පරිදි ඇසුරුම් කර වෙළෙඳපොළට ඉදිරිපත් කළ යුතුය. කැවෙන්ඩිස් කෙසෙල් වගාව සාර්ථකව කිරීම සඳහා නිසි සැලසුමක් සහ කළමනාකරණයක් අවශ්‍ය වනවා.

මහව ප්‍රාදේශී ලේකම් නඳුන් ආර්. සම්පත් මහතා මෙසේ කීය.

මෙම කෙසෙල් වගා කිරීමෙන් හොඳ ආදායමක් ලබා ගැනීමේ හැකියාවක් තියෙනවා. මුලින්ම කෙසෙල් පැළ 28,000 ක් ගොවීන් හතළිස් දෙනකු අතරේ දුන්නා. උනන්දුවෙන් ගොවීන් ක්ෂේත්‍රයේ මේ කටයුත්ත කරගෙන යනවා. මේ සඳහා තාක්ෂණික සහය ප්‍රදේශයේ අපනයනකරුවකු වන සමන්ත මහතාගෙන් ලබාදීමට කටයුතු කර තියෙනවා.

මසකට කෙසෙල් කිලෝ ලක්ෂ පහක් පමණක් අපනයනය කිරීමට අපි බලාපොරොත්තු වෙනවා. ලැබෙන ආදායම ඩොලර්වලට පරිවර්තනය වෙනවා. ප්‍රදේශයේ ජනතාවට ඉතා හොඳ ආදායම් මාර්ගයක්. වගාවත් සමඟ මුං, කවුපි වැනි යටි වගා කිරීම නිසා තවදුරටත් ආදායම වැඩිකර ගැනීමේ හැකියාවක්ද පවතිනවා. 
රැකියාවක් නොමැති තරුණ පිරිසට ආරාධනා කරනවා මෙවැනි වාණිජ වගාවවලට යොමු වෙමින් ජීවිතය සාර්ථකකර ගන්න කියලා.