(හර්ෂණ තුෂාර සිල්වා)

පාස්කු ඉරිදා එල්ල වූ මරාගෙන මැරෙන බෝම්බ ප්‍රහාරවලින් හානි සිදු වූ කොළඹ සිනමන් ග්‍රෑන්ඞ් සහ කිංග්ස්බරි හෝටල් දෙකට ජාතික රක්ෂණ භාර අරමුදලින් රුපියල් ලක්ෂ 500ක මුදලක් ලබාදුන් බව එම අරමුදලේ සභාපති මංජුල ද සිල්වා මහතා ලංකාදීපයට අද (29) පැවැසීය.

කොළඹ සිනමන් ග්‍රෑන්ඞ් සහ කිංග්ස්බරි යන හෝටල් දෙක ත්‍රස්තවාදී උවදුරු රක්ෂණාවරණය ලබාගෙන තිබූ බැවින් හානිය සම්පූර්ණයෙන් ඇස්තමේන්තු කරන තෙක් අත්තිකාරමක් ලෙස එම මුදල ලබාදුන් බව ද මංජුල ද සිල්වා මහතා කීවේය.

හෝටල් දෙකට සිදු වූ සම්පූර්ණ හානිය ගණනය කිරීම සඳහා ස්වාධීන තක්සේරුකරුවකු පත් කර ඇතැයි ද හෙතෙම පැවැසීය. එහි වාර්තාව සතියකින් ලැබෙනු ඇතැයි ද ඔහු සඳහන් කළේය. 

මරාගෙන මැරෙන බෝම්බ ප්‍රහාර මාලාවෙන් හානි සිදු වූ ෂැංග්‍රිලා හෝටලය ජාත්‍යන්තර සමාගමක් වන බැවින් සෘජුවම ගෝලීය රක්ෂණ ඔප්පු යටතේ ආවරණය වනු ඇතැයි ද මංජුල ද සිල්වා මහතා කීවේය. එම හෝටලයට සිදු වූ හානිය ගණනය කිරීම සඳහා ද විදෙස් තක්සේරුකරුවකු පැමිණෙන බව ද ඔහු තවදුරටත් පැවැසීය.