හිතකර කාලගුණ තත්ත්වය හේතුවෙන් සැප්තැම්බර් මාසයේ තේ පලදාව සියයට 27.6කින් වර්ධනය වී ඇතැයි ශ්‍රී ලංකා තේ මණ්ඩලය සඳහන් කරයි.

එපමණක් නොව පසුගිය වසරේ මුල් මාස නවය හා සැසඳීමේදී මේ  වසරේ මුල් මාස නවයේ තේ පලදාව ද සියයට 6.2ක් වර්ධනය වී ඇතැයි ද එම මණ්ඩලය සඳහන් කරයි. 

“පසුගිය අවුරුද්දේ සැප්තැම්බර් මාසය හා සැසඳීමේදී මේ වසරේ තේ නිෂ්පාදනය වැඩි වී තිබෙනවා. එහෙත් අහිතකර කාලගුණ තත්ත්වය නිසා පසුගිය වසරේ සැප්තැම්බර් මාසයේ දී තේ පලදාව පහත වැටුණා. හිතකර කාලගුණ තත්ත්ව නිසා මේ වසරේදී තේ නිෂ්පාදනය වැඩි වී තිබෙනවා. ඒ කියන්නේ අපට මේ වසර අවසානයේදී පසුගිය වසර හා සැසඳීමේදී හොඳ තේ පලදාවක් ලැබේවි” යැයි රොයිටර් පුවත් සේවයට අදහස් දක්වමින් ශ්‍රී ලංකා තේ මණ්ඩලයේ අධ්‍යක්ෂ ජෙනරාල් එස්.ඒ. සිරිවර්ධන පවසා තිබිණි. 

මේ වසර අවසානයේදී තේ කිලෝග්‍රෑම් මිලියන 305ත් 310ත් අතර පලදාවක් බලාපොරොත්තු විය හැකි යැයි ද සිරිවර්ධන මහතා කීය. පොහොර භාවිතය අඩු වීම, වෙළෙඳපොළ මිල ගණන් දුර්වල වීම, අහිතකර කාලගුණ තත්ත්ව හා කෘමිනාශක මත රජය පැනවූ තහනම නිසා පසුගිය වසරේ තේ නිෂ්පාදනය පහත වැටුණි. පසුගිය වසරේදී මෙරට තේ නිෂ්පාදනය වසර 7කට පසු අඩුම අගය වාර්තා කළ අතර අඛණ්ඩව තෙවැනි වරටත් තේ නිෂ්පාදනය පහත වැටිණි. 

055