( තිළිණි ද සිල්වා සහ රංජන් කටුගම්පොළ )

මහාමාර්ග හා මාර්ග සංවර්ධන හිටපු රාජ්‍ය අමාත්‍ය සහ ගම්පහ දිස්ත්‍රික් හිටපු පාර්ලිමේන්තු මන්ත්‍රී රංජන් රාමනායක විසින් විනිසුරුවරුන් සම්බන්ධයෙන් කළ ප්‍රකාශය හිතාමතාම කළ ප්‍රකාශයක් බව ඔහු විසින්ම අධිකරණයේ දී පිළිගෙන ඇතැයි රාමනායක මහතාට එරෙහි අධිකරණ අපහාස නඩුව ශ්‍රේෂ්ඨාධිකරණය හමුවේ අද (06) කැඳවූ අවස්ථාවේදී ජ්‍යෙෂ්ඨ අතිරේක සොලිසිටර් ජනරාල් සරත් ජයමාන්න මහතා පැවසීය.

රංජන් රාමනායක හිටපු රාජ්‍ය අමාත්‍යවරයාට එරෙහිව ගොනු කර ඇති පළමුවැනි අධිකරණ අපහාස නඩුව  සිසිර ද ආබෲ  , විජිත් මළල්ගොඩ සහ ප්‍රිති පද්මන් සුරසේන  යන මහත්වරුන්ගෙන් සමන්විත ශ්‍රේෂ්ඨාධිකරණ  විනිසුරු මඩුල්ලක් හමුවේ සලකා බැලිණි.

මෙම අධිකරණ අපහාස නඩුවට නීතිපති වෙනුවෙන් පෙනී සිටි රජයේ ජ්‍යෙෂ්ඨ අතිරේක සොලිසිටර් ජනරාල් සරත් ජයමාන්න මහතා සිය වාචික දේශන පවත්වමින් වැඩිදුරටත්  මෙසේද කීය.

“මෙය මෙම අධිකරණ අපහාස නඩුවේ තීන්දුව ප්‍රකාශ්‍යට පත් කිරීමට සිදු කරන අවසාන දේශනයයි.2017 අගෝස්තු 21 වන දින විත්තිකරු විසින් මාධ්‍යයට සිදු කළ ප්‍රකාශයක් සම්බන්ධයෙන් අධිකරණයේ ආරාධනය පරිදි නීතීපති මෙම නඩුකරයට සහභාගී වූවා.ඒ අනුව නීතිපති විසින් ආණ්ඩුක්‍රම ව්‍යවස්ථාවේ 105 වගන්තිය යටතේ අදිකරණයට අපහාස කිරීමේ චෝදනා පත්‍රය සහිත ආඥාවක් ඉදිරිපත් කළා.විත්තිකරු මෙම චෝදනා වලට නිවැරදිකරු යැයි පැවසූවා.

පැමිණිල්ලේ සාක්කි වෙනුවෙන් ශ්‍රේෂ්ඨාධිකරණ රෙජිස්ට්‍රාර්වරයාත් , මාධ්‍ය ආයතන දෙකක මාධ්‍යවේදීන් 6 දෙනෙකුත් කැඳවූවා.සිරස මාධ්‍ය ආයතනයෙන් තිදෙනෙක් සහ හිරු මාධ්‍ය ආයතනයෙන් තිදෙනෙක්ද සාක්කි දෙනු ලැබුවා.ඉන්පසු විත්තියේ සාක්කි ඉදිරිපත් කළ .විත්ති පාර්ශවයේ සාක්කිකරුවෙකු හැටියට ශ්‍රේෂ්ඨාධිකරණ රෙජිස්ට්‍රාර්වරයා නැවතත් කැඳවුනා.චිත්‍රපට අධ්‍යක්ෂක ප්‍රසන්න විතානගේ , රාවය හිටපු කර්තෘ විකටර් අයිවන් සහ අධිකරණ සේවා කොමිෂන් සභාවේ ලේකම්වරයා කැඳවූවා.

මම මෙම වාචික දේශනය කොටස් 3කින් ඉදිරිපත් කිරීමට බලාපොරොත්තු වනවා.ඉන් පළමු කොටස මෙම නඩුවේ සිදුවීම් මාලාවයි.දෙවැන්න සාක්කි විග්‍රයයි.තෙවැන්න මෙම නඩුවේ නෛතික ගැටළු විග්‍රහයයි.

විත්තිකරු දක්ෂ කථිකයෙක්.හිටපු පාර්ලිමේන්තු මන්ත්‍රීවරයෙක්. හිටපු නියෝජ්‍ය අමාත්‍යවරයෙක් ,ඔහු මයික්‍රොෆෝනයට අමුත්තෙක් නොවේ.ඔහු සබරගමුව පළාත් සභා මැතිවරණයෙන් වැඩිම මනාප ප්‍රමාණයක් ගත් අයෙක්ද වේ.මීට අවුරුදු කිහිපයකට පෙර හිටපු අමාත්‍ය එස්.බී.දිසානායක අමාත්‍යවරයාගේ අධිකරණ අපහාස නඩුව තිබුණත් , මෙම අධිකරණ අපහාස නඩුව අධිකරණ ඉතිහාසයේ විශේෂ නඩුවක් වනු නියතයි.ඒ නිසාම විත්තිකාර රංජන් රාමනායක මහතාට එරෙහි අධිකරණ අපහාස නඩුවේ ඉදිරියේදීයේ ප්‍රකාශයට පත් කෙරෙන තීන්දුව ඉතිහාසගත වන නඩු තීන්දුවක් වේවි.

මෙම සිද්ධියට මූලික වුනේ 2017 අගෝස්තු 21 වැනිදා එවකට අධිකරණ අමාත්‍යවරයාව සිටි විජේදාස රාජපක්ෂ මහතාගේ ඉල්ලා අස්වීම පිළිබඳව අරලිය ගහ මන්දිරයේ එක්සත් ජාතික පක්ෂ මන්ත්‍රී සාකච්ඡාවකි.මේ අවස්ථාවේදී මාධ්‍යවේදීන් විශාල පිරිසක් අරලියගහ මන්දිරයේ රැස්ව සිටියා.එම සාකච්ඡාව අවසන් වූ පසු විත්තිකරු මාධ්‍යයට සාකච්ඡා ලබා දුන්නා.විත්තිකරුගේ මෙම සාකච්ඡාවෙන් කොටසක් මාධ්‍ය මඟින් විකාශය කළා.අධිකරණයේ සාක්කි දුන් මාධ්‍ය ආයතන නියෝජිතයින් කියා සිටියේ විත්තිකරු මාධ්‍යයට දිගු සාකච්ඡාවක් ලබා දුන් නමුත් අදාළ කොටස් සංස්කරණය කරමින් විකාශය කළ බවයි.

(මේ අවස්ථාවේදී විත්තිකරු මාධ්‍යයට සිදු කළ සාකච්ඡාව ඇතුලත් වීඩියෝ පටය සම්පූර්ණයෙන්ම විනිසුරු මඩුල්ල ඉදිරියේ යළි විකාශය කෙරිණි)

සාක්කි විභාගයේදී විත්තිකරු පාර්ශවයෙන් අපූරු යෝජනාවක් ඉදිරිපත් කළා.ඒ එම වචනය වැරදීමකින් කියා සිටි බව විත්ති පාර්ශවයෙන් යෝජනා කළා.මගෙන් විනිසුරු වචනය පැන්නා යැයි විත්තිකරු පැවසූවා.ඕනෑම අයෙක් කතා කරන විලාසයක් තිබෙනවා.විත්තිකරු කතා කරන විට නම් , ආ ආ ආදී වචන විසි පාරක් භාවිත කර තිබෙනවා.ඒ අනුව මෙය නිකම්ම කටට ආ වචනයක් නොවෙයි.විත්තිකරු නිතරම කීවේ එය අත්වැරදීමක් කියලයි.එහෙත් එම වර්ෂයේ දෙසැම්බර් 14 වැනි දින ඔහු මෙම අධිකරණ භූමියේදීත් එවැනිම ප්‍රකාශයක් කළා.ඉන් ඔහු විසින් සිය පළමු ප්‍රකාශයම තහවුරු කළා.

ඒ අනුව ඔහු හිතා මතාම සිදු කළ ප්‍රකාශ බව ඔහු පිළිගෙන තිබෙනවා යැයිද ජ්‍යෙෂ්ඨ අතිරේක සොලිසිටර් ජනරාල් සරත් ජයමාන්න මහතා කියා සිටියේය.

නීතිපතිවරයාගේ වැඩිදුර වාචික දේශනය  ලබන 16 වැනි දිනට කල් තැබිණි.

විශ්‍රාමලත් හමුදා නිලධාරියෙකු වන සුනිල් පෙරේරා විසින් ඉදිරිපත් කළ පැමිණිල්ලකට අනුව නීතිපතිවරයා විසින් මෙම චෝදනා පත්‍රය රංජන් රාමනායක මහතාට එරෙහිව ගොනු කෙරිණි.

රංජන් රාමනායක මහතා එරෙහි අධිකරණයට අපහාස කිරීම සම්බන්ධයෙන් වන චෝදනා පත්‍රයේ මෙසේ සඳහන් වේ.

විත්තිකරු ශ්‍රී ලංකා ප්‍රජාතන්ත්‍රවාදී සමාජවාදී ජනරජයේ පාර්ලිමේන්තු මන්ත්‍රීවරයෙකුව සිටිමින් සමාජ සවිබල ගැන්වීමේ සහ සුබසාධන නියෝජ්‍ය අමාත්‍ය දූරය දරමින් 2017 අගෝස්තු 21 වැනි දින අග්‍රමාත්‍ය නිල නිවස වන අරලියගහ මන්දිරයේදී පාර්ලිමේන්තු කණ්ඩායම් රැස්වීමකදී මාධ්‍ය වෙත ලබා දුන් ප්‍රකාශයක් මඟින්  ආණ්ඩුක්‍රම ව්‍යවස්ථාවේ 105.3 වගන්තිය අනුව ශ්‍රේෂ්ඨාධිකරණයට අපහාසයක් සිදු කර ඇති බවට නුගේගොඩ , ගංගොඩවිල ,වලව්වත්ත පාර් ,අංක 43 /11 දරණ ස්ථානයේ පදිංචි රණවක සුනිල් පෙරේරා නැමැත්තා විසින් ශ්‍රේස්ඨාධිකරණයට පැමිණිලි ඉදිරිපත් කර ඇත.මෙම පැමිණිල්ල 2017 නොවැම්බර් 21  සහ දෙසැම්බර් 14 යන දිනයන්හී අධිකරණය හමුවේ කැඳවා ඊට අදාළව එම්.ටී.වී චැනල් පෞද්ගලික සමාගම කැඳවා අදාළ වීඩියෝපට විත්තිකරු හමුවේ අදාළ ප්‍රකාශ පෙන්වා ඇත.

ඒ අනුව ඒ අගවිනිසුරු ඇතුළු ශ්‍රේෂ්ඨාධිකරණ විනිසුරු මඩුල්ලේ මතය වී ඇත්තේ පැමිණිලිකාර පාර්ශවයේ ප්‍රකාශ අදාළ වීඩියෝ පටයේ සඳහන් වන බවය.

ඒ අනුව ආණ්ඩුක්‍රම ව්‍යවස්ථාවේ 105.3 යන වගන්තිය යටතේ විත්තිකාර හිටපු රාජ්‍ය අමාත්‍යවරයා ශ්‍රේෂ්ඨාධිකරණයට අපහාස කිරීම සම්බන්ධයෙන් වන පැමිණිල්ල විභාගයට ගැනීමට විනිසුරු මඩුල්ල තීරණය කර ඇත.

මෙයින් ආණ්ඩුක්‍රම ව්‍යවස්ථාවේ 105.3 වගන්තිය ප්‍රකාරව ශ්‍රේෂ්ඨාධිකරණයට අපහාස කිරීම සම්බන්ධයෙන් වරදකරු කොට විත්තිකරුට දඬුව්ම නොකිරීමට හේතු දක්වන ලෙසට නියෝග කරමින් මෙම ආඥාවක් නිකුත් කරමි.

අධිකරණයට අපහාස කිරීම සම්බන්ධයෙන් දඬුවම් නොකිරීමට හේතු ඉදිරිපත් කරන්නැයි දන්වා රංජන් රාමනායක මහතා වෙත යොමු කිරීම සඳහා වන චෝදනා ආඥා කෙටුම්පතක් අධිකරණය හමුවට ඉදිරිපත් කරන ලෙසට මීට පෙර ශ්‍රේෂ්ඨාධිකරණය කළ නියමය අනුව නීතිපතිවරයා මෙම කෙටුම්පතක් ශ්‍රේෂ්ඨාධිකරණයට බාර දෙන ලදී.

ඒ අනුව විත්තිකාර නියෝජ්‍ය අමාත්‍යවරයාට එරෙහි චෝදනා පත්‍රය ශ්‍රේෂ්ඨාධිකරණ ලේඛකාධිකාරීවරයා විසින් කියවා බාර දෙන ලදී.

පෙත්සම්කාර සුනිල් පෙරේරා මහතා  සිය පෙත්සම් වලින්  පෙන්වා දී ඇත්තේ පසුගිය වසරේ අගෝස්තු මස අග්‍රාමාත්‍යවරයා සමඟ පැවැත්වූ සාකච්ඡාවකින් අනතුරුව පිටතට පැමිණි රන්ජන් රාමනායක නියෝජ්‍ය  අමාත්‍යවරයා මාධ්‍යවලට අදහස් දක්වමින් මෙරට විනිශ්චකාරවරුන් සහ නීතිඥවරුන්ගෙන් බහුතරය දූෂිත පුද්ගලයින් ලෙස හඳුන්වා දී ඇති බව කියා සිටි බවය.

මෙම ප්‍රකාශය තුළින් මෙරට අධිකරණ පද්ධතිය කෙරෙහි මහජනතාවගේ පවතින විශ්වාසය බිඳ වැටෙන බවත් ඒ හරහා රංජන් රාමනායක නියෝජ්‍ය  අමාත්‍යවරයා අධිකරණයට අපහාසයක් සිදු කර ඇති බවත් පෙත්සම්කරුවන් කියා සිටිති.

මේ හේතුවෙන් රන්ජන් රාමනායක මහතා අධිකරණය හමුවට කැඳවා මේ පිළිබඳව විභාගයක් පවත්වා සුදුසු දඬුවම් පමුණුවන මෙන් ද පැමිණිලිකරු ශ්‍රේෂ්ඨාධිකරණයෙන් ඉල්ලා තිබිණි.

රංජන් රාමනායක මහතා වෙනුවෙන් නීතීඥ විරාන් කොරයා මහතා ද , නීතිපතිවරයා වෙනුවෙන් ජ්‍යෙෂ්ඨ අතිරේක සොලිස්ටර් ජනරාල්  ජනාධිපති නීතීඥ  සරත් ජයමාන්න මහතා පෙනි සිටියහ.