(*** දසුන් රාජපක්ෂ)

මුස්ලිම් අන්තවාදය සම්බන්ධයෙන් සකස් කළ නිබන්ධනයක් මගින් සහරාන් හෂීම්ගේ අන්තවාදී ක්‍රියා ගැන දැනගෙන සිටි බැවින් පාස්කු ඉරිදා බෝම්බ ප්‍රහාරය එල්ලවීමට ආසන්න කාලයේ සහරාන් හා මුස්ලිම් අන්තවාදී ක්‍රියා පිළිබඳ විශේෂ අවධානයක් යොමු කළ බව යුද හමුදා බුද්ධි අධ්‍යක්ෂ මණ්ඩලයේ විශේෂ සාක්ෂිකරුවෙක් පාස්කු ඉරුදින බෝම්බ ප්‍රහාර මාලාව සම්බන්ධයෙන් විමර්ශනය කරන ජනාධිපති කොමිසම හමුවේ සාක්ෂි දෙමින් ඊයේ (9) ප්‍රකාශ කළේය.

මෙම ජනාධිපති කොමිසම අභියාචනාධිකරණ විනිසුරු ජනක් ද සිල්වා මහතාගේ ප්‍රධානත්වයෙන් බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේ රූබි ශාලාවේ පිහිටි විශේෂ කාර්යාලයේදී ඊයේ  (9) රැස්විය.

එහිදී රජයේ නීතිඥ ඇසූ ප්‍රශ්නවලට යුද හමුදා බුද්ධි අධ්‍යක්ෂ මණ්ඩලයේ විශේෂ සාක්ෂිකරු මෙසේ පිළිතුරු දුන්නේය.

රජයේ නීතිඥ:- ඔබට පැවරී ඇති රාජකාරීන් මොනවාද?
සාක්ෂිකරු:- එක්සත් ජාතීන්ගේ සංවිධානයේ යම් යම් කොටස් සහ බුද්ධි සමාලෝචන වාර්තාවල  න්‍යාය පත්‍රයන් සැකසීම ඇතුළු රාජකාරීන් රැසක් සිදු කරනවා.

රජයේ නීතිඥ:- බුද්ධි සමාලෝචන රැස්වීමේ ඇති වටිනාකම සහ වැදගත්කම පහදන්න.
සාක්ෂිකරු:- මෙය ඉතාමත් වැදගත් රැස්වීමක්. රටේ ජාතික ආරක්ෂාව සම්බන්ධයෙන් බලපාන ආරක්ෂක මණ්ඩල රැස්වීමට පසු පවත්වන වැදගත්ම රැස්වීම මෙයයි. ජාතික ආරක්ෂාවට බලපාන සියලු බුද්ධි තොරතුරු මෙහිදී සාකච්ඡා කෙරෙනවා.

රජයේ නීතිඥ:- මෙම රැස්වීමට න්‍යාය පත්‍රයක් තිබේද?
සාක්ෂිකරු:- ලැබෙන බුද්ධි තොරතුරු සමාලෝචනය කර සටහන් ලබාගැනීම් සිදුකර න්‍යාය පත්‍රය සකසනවා.

රජයේ නීතිඥ:- ඔබ සමග ජාතික බුද්ධි ප්‍රධානී ලෙස කටයුතු කළ නියෝජ්‍ය පොලිස්පති සිසිර මෙන්ඩිස් අපරාධ පරීක්ෂණ දෙපාර්තමේන්තුවේ සිටි නිලධාරියකු නිසා බුද්ධි සේවාවට සම්බන්ධ කටයුතු කිරීමට ඔහුට අත්දැකීම් තිබුණාද?
සාක්ෂිකරු:- රහස් පොලිසියේ වසර තිස් පහක අත්දැකීම් එතුමා සතුව තිබුණා. නීතිය සම්බන්ධයෙන් ඔහුට ලොකු  දැනුමක් තිබෙනවා. බුද්ධි තොරතුරුවලට අදාළව අපි ලබාදෙන සියලු උපදෙස් ඔහු බාරගත්තා. ඒ අනුව ඔහු කටයුතු කළා.

රජයේ නීතිඥ:- බුද්ධි සමාලෝචන රැස්වීමට ප්‍රථමයෙන් ආරක්ෂක ලේකම්වරුන් සමග ඔබට සාකච්ඡා කිරීමට අවස්ථාව නොලැබුණේ ඇයි?
සාක්ෂිකරු:- වෙනත් කටයුතු කෙරේ වැඩි සැලකිල්ලක් දැක්වීම නිසා බුද්ධි අංශ කළ ඉල්ලීම්වලට යහපාලන රජය යටතේ පත් කළ ආරක්ෂක ලේකම්වරුන් දෙදෙනෙකු අවධානය යොමු කළේ නැහැ.

බුද්ධි සමාලෝචන රැස්වීම්වලදී සාකච්ඡා කරන දේවල් හා කළ යුතු ක්‍රියාමාර්ග ගැන බුද්ධි අංශ ප්‍රධානීන්ට නැවත වරක් අපි දැනුම් දීමක් කරනවා.

ජාතික බුද්ධි ප්‍රධානී කාර්යාලයේ සම්පත් ඉතා සීමිතයි. ආරක්ෂක අමාත්‍යාංශයේ සංවිධාන ව්‍යුහයේ ජාතික බුද්ධි ප්‍රධානී කාර්යාලය නැහැ. රටක් වශයෙන් මීට වඩා ජාතික ආරක්ෂාව තහවුරු කර ගැනීමට නම් ජාතික බුද්ධි ප්‍රධානී කාර්යාලයේ පහසුකම් වැඩිකළ යුතුයි.

රජයේ නීතිඥ:-  පාස්කු ප්‍රහාරය එල්ල කළ සහරාන් හෂීම් ගැන ඔබ වෙත තොරතුරු ලැබී තිබුණේ කුමන ආකාරයෙන්ද?
සාක්ෂිකරු:- සහරාන්  හෂීම් මුස්ලිම් අන්තවාදී කටයුතු සිදු කළේ අන්තර්ජාලය භාවිතා කර සමාජ ජාලා හරහා ඔහුගේ මතවාදී වැඩ ගැන අපි තොරතුරු එකතු කෙරුවා. ඉන්පසු බුද්ධි සමාලෝචන රැස්වීමට ඒවා ඉදිරිපත්  කළා. විවෘත තොරතුරු හරහා සහරාන්ලා ගැන බුද්ධි තොරතුරු රැස් කරගෙන තිබුණද ඔවුන් කිරීමට යන වැඩ සහ කරමින් සිටි වැඩ ගැන සංවෘත බුද්ධි තොරතුරු මුලින් ලැබී තිබුණේ නැහැ.

බුද්ධි අංශ ලබාදෙන බුද්ධි තොරතුරු ඒ බුද්ධි අංශයේ නමින් අපි ෆයිල්  පවත්වාගෙන යනවා. බුද්ධි දත්ත පරිගණක තුළ ගබඩා කර තිබුණේ නැහැ. සහරාන්ලා පිළිබඳ රාජ්‍ය බුද්ධි සේවා බුද්ධි අංශයේ ෆයිල්වල තමයි  තැන්පත් කර තිබුණේ.

විනිසුරු මඬුල්ල:-  ආගමික අන්තවාදීන් ගැන වෙනම ගොනු පවත්වාගෙන ගියාද?
සාක්ෂිකරු:- එලෙස  නිශ්චිතව සිදුවුණේ නැහැ.

රජයේ නීතිඥ :- සහරාන්ලා ගැන බුද්ධි සමාලෝචන රැස්වීම්වලදී සාකච්ඡා කර තිබුණ ද?
සාක්ෂිකරු :- අපිට ලැබුණු බුද්ධි තොරතුරු න්‍යාය පත්‍රයට ඇතුළත් කර සහරාන්ගේ අන්තවාදී ක්‍රියා ජාතික ආරක්ෂාවට තර්ජනයක් එල්ල කරන බව අපි දැනුම් දී සිටියා. අවස්ථා දෙකකදී අපි සහරාන් ගැන න්‍යාය පත්‍රයට ඇතුළත්  කළා. පාස්කු ප්‍රහාරයට පෙර මාර්තු මාසයේදී අපි විශේෂ අවධානයකින් සිටියා. 2013 වසරේ මා මුස්ලිම් අන්තවාදය ගැන නිබන්ධනයක් කර කරුණු අවබෝධ කරගෙන සිටි නිසා සේ කළා.
මගේ නිබන්ධනයට අවශ්‍ය තොරතුරු රැස්කිරීම සඳහා 2013 ඔක්තෝබර් මාසයේ මා තවත් බුද්ධි නිලධාරියකු සමඟ සහරාන් හමුවුණා.  ඒ අනුව මා සහරාන් ගැන හොඳට දැනගෙන  සිටියා. සහරාන්ගේ ක්‍රියා ජාතික ආරක්ෂාවට තර්ජනයක් එල්ල කරන බව මුල සිට මා තක්සේරු කර තිබුණා.

විනිසුරු මඬුල්ල:-  ඔබ බුද්ධි අංශ නිලධාරියකු බව හමු වූ අවස්ථාවේ සහරාන් දැනගෙන හිටියද?
සාක්ෂිකරු:- නැහැ. මා අන්ඩකවර් හිටියේ. හමුදා බුද්ධි අංශයේ මෙහෙයුම්වල සිටි අනන්‍යතා හෙළි නොවී තිබූ මුස්ලිම් නිලධාරියකු හරහා තමයි මා සහරාන් හමුවුණේ.

රජයේ නීතිඥ:- ඔබ සහරාන් සමඟ සාකච්ඡා  කළේ මොන මොන කරුණු ගැනද?
සාක්ෂිකරු:- සහරාන් සමග මා පැය දෙක හමාරක් පමණ සාකච්ඡා කළා. රහසිගතව අපේ කතාව මා පටිගත කළා. අනෙකුත් ජාතීන් අතින් මුස්ලිම් ජාතියට බලපෑම් එල්ලවන බව කිව්වා. බොදුබල සේනාවේ ක්‍රියා සහ ඥානසාර හිමියන් ගැනද ඔහු සඳහන් කළා.

මුස්ලිම් ජනතාව මුහුණ දෙන ගැටලු ගැන දේශපාලන අධිකාරිය කිසිදු පියවරක් ගන්නේ නැති බව ද සහරාන් කිව්වා. පාඨලී චම්පික හිටපු අමාත්‍යවරයා මුස්ලිම් අන්තවාදය ගැන ලියපු කෘතියක් මෙරට තුළ තහනම් කළ යුතු බවද ඔහු කිව්වා.

 අනෙකුත් ජාතීන්ගේ සංස්කෘතින් සමඟ එකතු වී කටයුතු කිරීමට අනවශ්‍ය  බවද මෙරට තුළ ෂාරියා නීතිය ස්ථාපිත  කොට සියලු දෙනා එම ආගම භාවිතා කළ යුතු බව සහරාන් දැඩිව කියා සිටියා. ලාංකිකයකු ලෙස පෙනී සිටීම ඔහු ප්‍රතික්ෂේප කළා.

මා කළ සොයා බැලීමකදී සෞදි අරාබිය හා ඉරානය හරහා සහරාන්ලාට විදේශ ආධාර ලැබී ඇති බව අනාවරණය කරගැනීමට හැකි වුණා.
විනිසුරු මඬුල්ල:-  අන්තවාදය ත්‍රස්තවාදය දක්වා  වර්ධනය වීමේදී වෙනත්  ජාතියක් ලෙස වෙන්වීම යන කාරණය ඉස්මත්තට පැමිණෙනවා නේද?
සාක්ෂිකරු:- සහරාන් කතා කර තිබුණේ ඒ ගැන තමයි.

විනිසුරු මඬුල්ල:- 2013 දී ඔබ සහරාන් ගැන දැනගත් පසුව ඒ ගැන ආරක්ෂක අමාත්‍යාංශය හෝ බුද්ධි අංශ දැනුවත් කිරීමක් කළාද?
සාක්ෂිකරු:- නැහැ. මේ තොරතුරු දැනුම් දුන්නොත් යුද හමුදාවෙන් පවා මට ඉවත් වීමට සිදුවේවි යැයි  මට යම් අයකුගෙන් උපදෙස් ලැබුණා. 2015 වසරින් එවකට හිටපු රජය අවධානය යොමු කළේ මුස්ලිම් අන්තවාදයට වඩා ජාතීන් අතර  සහජීවනය සහ අවතැන්වූවන් නැවත පදිංචි කරවීම ගැනයි.

විනිසුරු මඬුල්ල:- සහරාන් දැරූ අන්තවාදී මත දරන වෙනත් පුද්ගලයන් ඔබට හමුවුණාද?
සාක්ෂිකරු:-  ඔව්. මා මද්‍රසා පසල්වලට ගියා. මට බොහෝ මුස්ලිම් අන්තවාදීන් හමුවුණා. මද්‍රසා පාසල්වලට විශාල විදේශ ආධාර ලැබී තිබුණා.

ඒ වගේම විදේශීය අන්වාදී දේශකයන් මද්‍රසා පාසල්වලට පැමිණ විවිධ දේශන පවත්වමින් සිටියා. පසු කලෙක විදෙස් දේශකයන් මෙරටට පැමිණීම නියාමනය කළා යැයි කියා සිටියේය.

මෙම ජනාධිපති කොමිසම ලබන සඳුදා (13) යළි රැස්වීමට නියමිතය.