(නයෝමි දිල්රුක්ෂි)
කෑගල්ල සෞඛ්‍ය වෛද්‍ය නිලධාරි බල ප්‍රදේශයේ බුළුගහදෙණිය මහජන සෞඛ්‍ය පරීක්ෂක කොට්ඨාශයට අයත් සමගිගම ඇටෝරැවාව ප්‍රදේශයට සංචරණ සීමා පැනවීමට කටයුතු කළ බව බුළුගහදෙණිය මහජන සෞඛ්‍ය පරීක්ෂක බණ්ඩාර අත්තනායක මහතා අද (30) පැවසීය.

සමගිගම ඇටෝරැවාව ප්‍රදේශයෙන් කෝවිඩ් 19 වයිරසය ආසාදිත පුද්ගලයන් 04 දෙනෙකු හඳුනා ගැනීමත් සමග පවුල් 15ක් ස්වයං නිරෝධායනයට යොමු කර ඵම ප්‍රදේශයට සංචරණ සීමා පැනවීමටසෞඛ්‍ය අංශ සහ පොලිසිය ඵක්ව කටයුතු යොදා ඇත.

ඇටෝරැවාව ප්‍රදේශයේ පුද්ගලයන් 65දෙනකු සඳහා පී.සී.ආර්. පරික්ෂණ සහ රැපිඩ් ඇන්ටිජන් පරීක්ෂණ සිදුකිරීමට කෑගල්ල සෞඛ්‍ය වෛද්‍ය නිලධාරි කාර්යාලය මගින් ඊයේ (29) කටයුතු යොදා තිබිණි.

එහිදි සිදුකල ඇන්ටිජන් පරික්ෂණයෙන් කෝවිඩි 19 වයිරසය අසාදිත පුද්ගලයන් 04දෙනකු හඳුනාගෙන ඇති අතර පී සී ආර් ප්‍රතිඵල දින 03කදී ලැබිමට නියමිතය.

මෙදින හඳුනාගත් ආසාදිතයන් සහ කලින්  මෙම ප්‍රදේශයේ වාර්තා වූ රෝගීන් ගණන 08 දක්වා ඉහළ ගොස් ඇත.

මෙම ආසාදිත පොකුර  ප්‍රදේශයේ සූදු පිටියකින් ඇරඹූ බවත් ඵම නිවසේ උපන්දින සාදයක් පැවැත් වූ බවටද මේ වනවිට අනාවරණය වී ඇති බව සෞඛ්‍ය අංශ වැඩිදුරටත් සඳහන් කළේය.

කෑගල්ල දිස්ත්‍රික්කය තුළ කොරෝනා මරණ 12 ක් වාර්තා වී ඇති අතර වයිරසය ආසාදිත පුද්ගලයන් 2022 දෙනෙකු හඳුනාගෙන ඇති බවත්, මේ වනවිට සුවය ලැබූ පිරිස 1285 දෙනෙකු බවත්, පුද්ගලයන් 4711දෙනෙකු නිරෝධායනයට යොමු කිරීමට කටයුතු යොදා ඇති බවත් කෑගල්ල දිස්ත්‍රික් සෞඛ්‍ය සේවා අධ්‍යක්ෂක වෛද්‍ය කුමාර් වික්‍රමසිංහ මහතා අප කළ විමසීමකදී පැවසීය.