කුඩා දරුවෝ හැමෝම අද තරගකාරී අධ්‍යාපන රටාවකට අනුගතවී සිටිති. විවේකයක් නොමැති තරමටම කාර්යබහුල වීම නිසා කුඩා වියේ සිටම මානසික සුවතාව ගිලිහී ගොසිනි. ඒ හේතුවෙන් අධ්‍යාපනික පැත්තෙන් දුර්වල වීම, විෂය සමගාමී ක්‍රියාකාරකම් මඟ හැරීම, විෂය කරුණු මතකෙන් ගිලිහී යාම වැනි දෑ සිදු වේ.

විශේෂයෙන් පෙර පාසල් සහ පාසල් වියේ පසුවන කුඩා දරුවකුගේ මානසික සුවතාව සඳහා කළ හැකි දේවල් මොනවාද යන්න අද මාතෘකාවයි.

දරුවන් ගැන කතා කරද්දී මානසික සෞඛ්‍යය කියන කාරණය ඉතාම වැදගත්. එය වඩාත් පලදායී වීම සඳහා දරුවාගේ නිවසේ සිටම විවිධ ක්‍රියාකාරකම් අත්හදා බැලිය හැකිය. අපි එය දරුවාගේ නිදන කාමරයේ සිටම අරඹමු.

උදෑසන අවදි වූ මොහොතේ සිට නිදා ගැනීමට යනතුරුම අපි ලස්සන සහ පිළිවෙළ කියන දේට ප්‍රමුඛත්වය දුනහොත් එය මනසට සුව අයුරින් තැම්පත් වේ. කුඩා දරුවකුගේ නිදන කාමරය පිරිසුදු සහ පිළිවෙළ වීම තුළින්

♦ දරුවා ලෙඩ රෝගවලින් ආරක්ෂා වේ.

♦ පිළිවෙළ වඩාත් හොඳින් ප්‍රගුණ කරයි.

♦ මනස නිරවුල් වේ

♦ මානසික ආතතියෙන් බැහැර වේ.

තමා ඇඳි ඇඳුම් පැළඳුම් තැන තැන දමා ඇති අපිරිසුදු , අපිළිවෙළ කාමරයක මොහොතක් ගත කිරීම කෙසේ වෙතත් එබඳු කාමරයක් දැකීම පවා මනසට මහත් පීඩාවකි.

දරුවකුගේ කාමරයක පිළිවෙළ සඳහා පහත කරුණු සැපිරිය යුතු වේ.

♦ නිදන කාමරයක් සඳහා හිතකර පරිසරයක් වීම

♦ වාතාශ්‍රය සේම මනාව හිරි එළියද ලැබීම

♦ දැඩි ඝෝෂාකාරී පරිසරයකින් නිදහස් වීම

මෙකී පිළිවෙළ අපි කුඩා දරුවකුගේ බාහිර රූපයෙන් පවා දැකිය යුතුය. පිරිසුදුකම සේම පිළිවෙළ කියා දිය යුත්තේ මවුපියන් විසිනි. වරුවකට දෙකකට නොව එය ජීවිත කාලය පුරාම දරුවාට පවත්වා ගැනීමටද පුරුදු පුහුණු කළ යුතු වේ.

නිවසින් බැහැරව කෙතරම් පීඩාකාරී පරිසරයක සිට පැමිණියද ලස්සනට සහ පිළිවෙළට ඇති තමන්ගේ නිදන කාමරය හැරුණු කොට මනසට සුවදායී තැනක් ලොව වෙන කොහේද?

-සටහන- මාධවී ධර්මරත්න