(හික්කඩුව විශේෂ - අමරසේන විතානගේ) 
හැටඅට වැනි වියේ පසුවන පුද්ගලයෙකුට කාන්තාවක විසින් අංකල් යයි අමතා වැඩි වේලාවක් යන්නට මත්තෙන් ඇයගේ වයස 69ක් බව හෙළිවීමෙන් ලැජ්ජාවට පත්වීමේ සිද්ධියක් හික්කඩුව ආරච්චිකන්ද බාහිර රෝගීන්ගේ අංශයේ පෝලිමේ දී දැකගන්නට ලැබිණ. 

හැටඅටේ පුද්ගලයා උදෑසනම රෝහලට ගියේ තම පාදයේ ඇති වූ තුවාලයකට ප්‍රතිකාර කර ගැනීමේ අපේක්ෂාවෙනි. එදින සායන දිනයක් ද වූයෙන් රෝගීන් විශාල පිරිසක් තුණ්ඩු ලියවා ගැනීමටත් ප්‍රතිකාර සටහන් පොත් ලකුණු කරගැනීමටත් එක තැන පොරකන පෝලිම් දෙකකට රොක් වී සිටියහ. 

බාහිර රෝගීන්ගේ අංශයේ පෝලිමට එක් වූ මේ පුද්ගලයාට ඉදිරියෙන් සිටියේ ඔහුගේම වයසට ආසන්න පෙනුමක් ඇති කාන්තාවකි. 

අංකල් ඉන්නේ ඕ.පී.ඩී. එකෙන් බෙහෙත් ගන්න ද නැත්නම් සායනටය දැයි මේ කාන්තාව ඔහුගෙන් විමසා සිටියාය. තමා තරම් වියපත් පෙනුමක් ඇති ඇයගේ අංකල් ඇමතුමෙන් උරණ නොවී උපේක්ෂා සහගතව ඇයට පිළිතුරු දුන් ඔහුට ඇයගේ වයස කොපමණ දැයි දැනගන්නට හැකි වූයේ තුණ්ඩු ලියන රාජකාරියේ යෙදී සිටි සේවිකාව ඇයගෙන් වයස ඇසූ තැනේදීය. වයස 69 යයි. ඇය සේවිකාවට පිළිතුරු දුන්නාය. 

මට තවම 68යි. 69ක් වන ඔයාට මම ඇන්ටි කිව්වාට තරහ ගන්නට එපා හොඳේ යයි ලද පළමු අවස්ථාවම ප්‍රයෝජනයට ගත් ඔහු පිරිස ඉදිරියේම ඇයට පැවසු විට ඇය කිසිත් නොකියා ලැජ්ජාවෙන් බිම බලා ගත්තීය.