(වැලිමඩ කේ.ආර්. රාජමන්ත්‍රී)
 වෙළෙඳසල් සේවකයා උදෑසන දියනෑමෙන් ඇතිවන හිසේ බරගතිය පහකර ගැනීමට වෙළෙඳසළ තුළදී විශාල ශබ්දයකින්  පිටකරන ලද කිවිසුම් හඬ කොරෝනා  රෝගියකුගේ යැයි  වරදවා වටහා ගත් පාරිභෝගිකයන් ව්‍යාපාරික ස්ථානයෙන් භාණ්ඩ මිලට නොගෙන කඩිනමින් පිටව යෑමෙන් සිදුවූ පාඩුවෙන් ව්‍යාපාරිකයාට යකා නැගීමේ පුවතක් වැලිමඩ නගරයෙන් අසන්නට ලැබේ.

දැනගන්නට ඇති අන්දමට වැලිමඩ නගරයේ ව්‍යාපාරික ස්ථානයක සේවය කරන සේවකයා දිගුකලක සිට අලුයමින් දියනාගෙන සේවයට පැමිණීමට හුරුපුරුදුව සිටින්නෙකි. එනිසාම ඔහුට හිසේ බරගතිය ඇතිවේ. එම අවස්ථාවේදී හිසේ බරගතිය පහකර ගැනීමට විශාල ශබ්දයක් පිටකරමින් කිවිසුම් කිහිපයක් පිටකිරීමට ඔහු පුරුදුව සිටියේය. එසේ  හිස ගැස්සෙන අන්දමට කිවිසුම් පිට කිරීමෙන් මනා සුවයක් අත්වෙන බව ඔහු කියා සිටින්නේ උජාරුවෙනි.

මේ දිනවල පවතින කොරෝනා වසංගතය නිසා සෞඛ්‍ය ආරක්ෂිතව මුව ආවරණ සහිතව සේවය කළත් කිවිසුම් යෑමට පෙර නිමිති දැනෙන විට ඔහු කඩිනමින් ඉහළ මාලයට ගොස් කිසිවකුටත් නෑසෙන  ලෙසින් කිවිසුම් යැවීමට  පුරුදුව සිටියේය. 

එහෙත් මෙදින පෙරසේ කිවිසුම පිටවන්නට ආසන්න වෙද්දී ඔහුට ආරක්ෂිත ස්ථානයට යැමට ප්‍රමාද වී ඇත. අතර මගදීම ශබ්දනඟා කිවිසුම් කිහිපයක් යවා හිසේ බරගතියෙන් මිදුණ ඔහු සැනසිලි සිතකින් නැවත සේවය කරන ස්ථානයට එන විට පාරිභෝගිකයන්  භාණ්ඩ ගැනීම පසෙකලා පිටව ගොස් ඇති බව දැක ඇත.

 භාණ්ඩ නොගෙන පාරිභෝගිකයන් පිටව යෑමෙන්  කෝපව සිටි ව්‍යාපාරිකයා ඔය කිවිසුම් මගුලෙන් බිස්නස් අඩුකාලේ රුපියල් දහස් ගණනක පාඩුවක් වුණා. ඒ හින්දා ඉක්මනට ඔය කිවිසුම් කෙහෙල්මල සනීපකරගන්න යැයි ව්‍යාපාරිකයා සේවකයාට පවසා ඇතැයි පැවසේ.