කරන්දෙණිය එම්. සුසිල් පි්‍රයන්ත
කිව්.ආර්. කේතයට ලබාගත් තෙල් රෝන්දේ ගසන්නට මදිවී තමාට උගන්වන ගුරුවරියගේ යතුරු පැදියෙන් ඇද්ද ගෝලයන් දෙදෙනකු පිළිබඳ පුවතක් දකුණු පළාතේ පාසලකින් අසන්නට ලැබේ.

නගරයේ ප්‍රසිද්ධ පාසලකි. අදට වඩා මේ පාසල නමක් ගෙන තිබුණේ එදාය. පාසලට ඒමට ප්‍රධාන ගේට්ටුවට අමතරව තවත් ගේට්ටුවක් තිබුණේය. ඒ විදුහල පිටිපසිනි. ඒ පැත්ත නිතර පාසල් සිසුන් හා ගුරුවරුන් ගැවසෙන පැත්තක් නොවන නිසා පාළු බවක් ඉසිලීය.

ඇතැම් ගුරුවරුන් මේ පැත්තෙන් සිය යතුරු පැදි ගාල් කරනුයේ ඒ ආසන්නයේ පන්ති කාමරවලට ඉගැන්වීම් කරන නිසාය. ඒ තමන්ගේ පහසුව මෙන්ම සිය යතුරු පැදි සෙවණේ තැබීමට ඇති හැකියාව ගැන සිතාය.

මේ අතර පාසලට යාබද නිවෙසක උදේ මිදුල අමදින කාන්තාවක් විදුහල්පතිවරයාට දුරකතන ඇමතුමක් දුන්නාය. ඒ අනුව විදුහල්පතිවරයා තවත් ගුරුවරුන් පිරිසක් සමග කාන්තාව දුන් තොරතුර අනුව එම ස්ථානයට ගිය විට දුටු දෙයින් බිරාන්තව ගල් ගැසුනාහ. ඒ සිය විදුහලේ ඉගෙනුම ලබන සිසුන් දෙදෙනෙක් ගුරුවරියක එන යතුරු පැදියෙන් තෙල් අදිනු දැකීම නිසාය.

බඩුත් එක්ක පාසල් හොරු දෙන්නා මාට්ටුවිය. අනේ සර් කිව්.ආර්. කේතයෙන් ලබා දුන්නු තෙල් ඉවරයි. ඒකයි මේකෙන් ටිකක් ඇද්දේ යයි කියද්දී වේවැල් පාර පිට හරහා සිසුන්ට වැදුණේ ඇඟ හිරිවට්ටාගෙන යමිනි.