හිඟු‍රානේ නවරත්න සමරතුංග 
ගරුඬකු කළ අබැද්දියක් හේතුවෙන් උපන් ඇඳුමෙන් කෙසෙල් පඳුරක සැඟවී සිටි සැමියකුට බිරිඳ චීත්ත රෙද්දක් අඳින්නටදී විලි වසා ගැනීමට සැලසූ පුවතක් දිගාමඩුල්ලේ ගමකින් වාර්තා වේ. 

සිද්ධිය මෙසේය. 

වෙලාව සවස පහමාරට පමණ විය. මේසන් වැඩක යෙදෙන සැමියා වැඩ ඇරී නිවෙසට පැමිණියේ වැහි කෝඩයක් ඇද හැළෙන්නට ඔන්න මෙන්න කියා තිබියදීය.  

ඔහු‍ගේ මුළු ගතම හුණු සිමෙන්ති තැවරී තිබුණි. ඒවා නාස්පුඩු වල පවා සිරවී තිබුණ බැවින් ඔහු ගෙය පිටුපසට ගියේ පයිප්ප‍යෙන් දිය නාගැනීමටය.

‘මටත් නාගන්න ඕනෑ වැස්සකුත් එනවා ඉක්මනට නාලා එන්නැයි’ බිරිය පැවසුවාය. තුවායක් ඇඳගත් ඔහු දිය නාමින් සිටියදී එතැන සිටි විශාල ප්‍රමාණ‍යේ ගරුඬෙක් ඔහු ඇඳ ගෙන සිටි තුවාය දිගේ ඉහළට නැඟ ඉන හරියේ නතරවිය. 

කිසියම් සං‍වේදී බවක් දැනුණ  ඔහු එදෙස විපරම් කරද්දී ගරුඬා දැක  ‘බුදු අම්මෝ..’ කියා කෑ ගසමින් තුවායද බිම දමා ඒ අසල තිබුණ ‍කෙසෙල් පඳුර ළඟට දිව ගියේය.

ඔහුගේ කෑගැසීම ඇසුණ යාබද නිවෙසේ කාන්තාවද විමසිලිමත්ව ඒ අසල තිබුණ වැට ළඟට ආවාය.  

එවිට ඔහු ලැජ්ජාවෙන් බේරීමට කෙසෙල් පඳුරේ සැඟවී සිටියදී බිරිඳ සැමියාට මුහුණ පෑමට වූ අබැද්දිය දැක්කාය. ඇය එතැන රෙදි වැලේ තිබුණ චීත්තයක් ගෙන  ඇඳගන්නට දුන්නේ ඇයට වෙන කළ හැකි දෙයක් නොවූ හෙයිනි. එහෙත් උපන් ඇඳුමෙන් සිටි ඔහු චීත්තය දවටාගෙන කෙසෙල් පඳුරෙන් එළියට විත් ගෙතුළට රිංගා ගත්තේය.