කරන්දෙණිය එම්.සුසිල් පියන්ත

කෙල්ල ඇඹරූ ගැටයට කොල්ලො ටිකම හසුවී ඇඟ රත්කර ගන්න ගෙනා සියලු‍ම මුදල් අහිමි කර ගත් කතාවක් අම්බලන්ගොඩ මහජන ක්‍රීඩාංගණය ඉදිරිපිට කුඹුක් ගහ යටින් අසන්නට ලැබේ.
අම්බලන්ගොඩ කොල්ලන් ටික සෙට් වෙන්නේ මෙතනය. දන්සල් දෙන්න කතා කර ගන්නේද මෙතනය. මිතුරකුට උදව්වක් පදව්වක් කරන්න කතා කර ගන්නේත් මෙතනය. ක්‍රීඩාංගණයේ ක්‍රිකට් තරගයක් අතරතුර එය නරඹමින් ඔවුහු අහිංසක සතුටක් භුක්ති විදිති. ඉදහිට මෙතන සිට ඇඟ රත්කර ගන්නා අවස්ථා නැත්තේද නොවේ. නිවසින් මඳ විරාමයක් ලැබුණු ගමන් ඔවුහු මෙතනට දිව එති. කති, බොති, විනෝද වෙති. කාටවත් කරදරයක් නැතිව ඔවුහු තමන්ගේ කාන්සිය පාළුව මෙතැන සිට ගෙවා දමති. ඒ මේ අම්බලන්ගොඩ මහජන ක්‍රීඩාංගණය ඉදිරිපිට කුඹුක් ගහ යටය.
අපේ කට්ටියම මෙතන මෙදා ඉන්නා විට නාඳුනන කෙල්ලක් ආවාය. ගියේ ටික වේලාවකි මේ කෙල්ල එක පාරටම කපා හෙලූ කෙහෙල් කඳක් මෙන් බිම වැටුණාය. අපේ දුක් ගන්නා රාලලා සිතුවේ ඇය නිරාහාරව ක්ලාන්තව වැටෙන්න ඇතැයි සිතාය. එහෙයින් ඔවුහු දනිපනිගා එදා ඇඟ රත්කර ගැනීමට ගෙනා මොනරු කොළ කිහිපයක්ම එකතු කළහ.
ඒ විතරක්ම නොව ක්ෂණයකින් 1990 සුව සැරිය ගිලන් රථයක් ද ගෙන්වීමට ඔවුහු කටයුතු කළහ. සිහිය ආ ඇයට තමන් එකතු කළ මොනරු සියල්ලම දුන්හ. ඇය සුව සැරියෙන් බලපිටිය රෝහලටද පිටත් කර හැරියාය.

අනේ මචෝ කෙල්ල බිම වැටුණු විට මගේ පපුව හෝස් ගා පත්තුවුණේ යයි එකෙක් කීවේය. මචං මට අපේ නෝනා මතක් වුණා යයි තව එකෙක් කීවේය. කට්ටියම දුක් සයුරේය. මේ අසරණ කෙල්ලට ඉක්මන් සුවය ලැබේවායි එතන සිටි අපේ සියල්ලෝම ප්‍රාර්ථනා කළහ. ඇත්තටම ඇය වෙනුවෙන් අවංකවම මේ අය දුක්වූහ.
මේ අල්ලපනල්ලේ ඇය ගෙනයාමට ආ සුව සැරියේ අයකු එතන සිටි අයකුට කීවේ මේ කෙල්ල කර ඇත්තේ රඟපෑමක් බවය. ඇය රෝහලට ඇතුළත් නොවී අපේ අය දුන්නු මොනර කොළ ටික ගැන ගැන නිවසට ගිය බවය. සියල්ලන්ටම පොළොව පලා ගෙන යන තරමේ ලජ්ජාවකුත් මීට ටිකකට කලින් මේ කෙල්ල ගැන ඇතිවූ දුක කලකිරීමකටත් පෙරළුණේ ආයෙත් නම් මේ වගේ ගැහැනු ගැටවලට අසු නොවන බව කියමින්ලු‍.