බිරිය මියගිය සැමියා රෝගාතුරව රෝහල් ගතව ප්‍රතිකාර ලබා නිවසට එනවිට ඔහුගේ දෙවැනි විවාහක තරුණ බිරිය තමන් ගෙනා දෑවැදිත් රැගෙන නිවසින් අතුරුදන් වූ පුවතක් යාපහුව රාජධානියට අයත් ගම්බද පෙදෙසකින් අසන්නට ලැබුණි.

ඔහු රාජ්‍ය සේවාවේ පරිපාලන තනතුරක් දැරූවෙකි. විවාහක පළමු විවාහයේ බිරිය ද රජයේ රැකියාවක නිරතව සිටියාය. ඔවුන්ට දාව දරුවන් තිදෙනෙකි. ඔවුන් තිදෙනාද රජයේ ඉහළ නිලතල හොබවති.

එම දරුවන් ද විවාහ වී ඔවුහු දරු මල්ලන් සමග පිටත වාසය කරති. ඔය අතරේ පියා හා මවද සේවයෙන් විශ්‍රාම ගියහ.

දෙදෙනාම විශ්‍රාම සුවයෙන් පසුවෙන අතරවාරයේ බිරිය හදිසියේ රෝගිව රෝහල් ගත කිරීමෙන් අනතුරුව මියගියාය.

නිවසේ තනිවූ සැමියා විශ්‍රාම වැටුප ගැනීමට යන එන අතරවාරයේ කඩවසම් රූමත් කතක් ඔහු නෙත ගැටුණි. ඇය තනිකඩය. මැදිවිය ඉක්මවා ඇත. ඔහු නිවසේ තනිය මකන්නට ඇයට ගෙනා යෝජනාවටද ඇයද එක පයින් කැමැති වූවාය.

 සැමියාගේ දරුවන්ට හොරෙන් නවක සහකාරිය එම නිවසට පැමිණ එහි නැවතුනාය.

ඇය එනවිට නිකම්ම ආවේ නැත. ඇය තනිව විසූ නිවසේ තිබූ සියලු බඩු මුට්ටු ද දෑවැදි ලෙස ගෙන ආවාය. දෙදෙනා සතුටින් එහි වාසය කරන අතරේ සැමියා ද හදිසියේ රෝගි වූයේය. ඔහු රෝහල් ගත කරනු ලැබීය.

රෝහලේ සිටි පියා බලන්නට දරුවන් පැමිණි දිනෙක ඔවුහු තම මහ ගෙදරට ද පැමිණියහ. නවක කුඩම්මා දැක කරුණු අසා ඔවුහු පුදුම වූහ.

පසුදින දරුවෝ නැවත පියා බලන්නට යාමට සැරසුනහ. ඒ අවස්ථාවේ ඔවුහු කුඩම්මා ඇමතූහ.

‘‘අපි තාත්තා බලලා ගෙදර එනකොට ඔහේට මේ ගෙදර ඉන්න බැහැ. හිටියොත් වෙන දේ බලා ගන්න පුළුවන්’’යි කියා ඔවුහු නික්ම ගියහ.

පියා රෝහලේ වාට්ටුවෙන් ටිකට් කපා ඇත. දරුවෝ පියා කැටුව ගෙදර එති. ඒ වෙලාවේ නවක බිරිය ගෙදර නැත. දරුවන්ගේ තර්ජන හමුවේ ඇය ගෙනා දෑවැදිත් රැගෙන පලා ගොස් ඇති බව වටහා ගත් පියා ඒ ගැන කිසිත් නොකියා ඇඳ මත දිගා වුණේ තවමත් අසනීපය නිට්ටාවටම සුව වී නැති නිසාලු.

• මොරගොල්ලාගම සිසිර කැලේගම