සපත්තු මහන්නාගේ සේවය ලබාගැනීමට පැමිණි පුද්ගලයාට සපත්තු මහන්නා ‘දොරේ’ කියා ආමන්ත්‍රණය කිරීමෙන් කෝපයට පත්ව ‘වැදගත් මිනිස්සුන්ට වැදගත් විදිහට කතා කරන්න ඉගෙන ගනින්’ යැයි පවසා සපත්තු මහන්නාට පහර දීමට තැත් කළ පුද්ගලයකු පිළිබඳ පුවතක් මහනුවර නගරයෙන් වාර්තා වේ.

හොඳට හැඳ පැළඳගත් වයස අවුරුදු 40ක් පමණ වයසැති අයෙකු මදුවිතෙන් පදම් වී තමා හැඳ සිටි සපත්තු ජෝඩුව පිළිසකර කර දෙන මෙන් නගරයේ වීදියක සපත්තු මසන පුද්ගලයෙකුගෙන් ඉල්ලීමක් කර ඇත.

සපත්තු මහන්නා ‘‘අනේ දොරේ අද දෙනවා කියා ගන්න බැහැ. වැඩ ගොඩයි. අද නම් දෙන්න විදියක් නැහැ තියලා යන්න දොරේ’’ කියා පැවසීමත් සමග ‘‘මම කවුද කියලා උඹ දන්නවාද? මට දොරේ කියන්න’’ යනුවෙන් පැවසූ සපත්තු හිමිකරු මසන්නාගේ බඩු මුට්ටුවලට පා පහර දීමට පටන් ගැනීම නිසා බියට පත් සපත්තු මසන්නාගේ කෑගැසීම නිසා අවට සිටි උදවිය සපත්තු මහන්නා ළඟට පැමිණ කරුණු විමසූ විට සපත්තු මහන්නා ‘‘මේ දොරේ මට ගහන්න හදනවා’’ යැයි පැවසීය. එවිට සපත්තු මැසීමට පැමිණි පුද්ගලයා ‘‘අන්න දැක්කද මේ මනුස්සයා වැදගත් මිනිස්සුන්ට කතා කරන්න දන්නේ නෑ මට දොරේ කියල අපහාස කළා’’ යැයි පැවසීය.

මේ කතා බහ අසා රැස්ව සිටි පිරිස අතර සිටි තරුණයකු ‘‘අනේ මහත්තයා දොරේ කියන්නේ දෙමළ භාෂාවෙන් මහත්තයා කියන එකටයි. ඒක තේරෙන්නේ නැති මේ වගේ මහත්වරුන්ට සිං​ඤ දොරේ කියල කීවානම් ඉවරයි’’ යැයි ප්‍රකාශ කිරීමත් සමඟ රැස්ව සිටි පිරිසගේ සිනහව සමඟ සපත්තු මැසීමට පැමිණි පුද්ගලයා හෙමින් සීරුවේ මාරු වී ගියේ කිසිවක් නොවූ ගානටය.

පේරාදෙණිය කුමාර රම්බොඩගෙදර