(වියලූව වාර්තාකරු)

මැදියම් රැයේ පදමට වෙරි වී නිවෙස බලා යමින් සිටියදී සර්පයෙකු දෂ්ඨ කළ පුද්ගලයකු, එම සර්පයා ටින් එකක දමාගෙන රෝහලකට පැමිණ සර්පයා ප‍්‍රදර්ශනය කරමින් රෝහල තුළ යකා නටන්නට වූ බව කියැවෙන පුවතක් ලංකාදීපයට වාර්තා විය.

සිද්ධිය මෙසේය.

ගම්බද රෝහලකි. මැදියම් රැයේ වෙරි මර ගාතේ එහි පැමිණි මැදිවියේ අයකු ටින් එකක දමාගෙන ආ සර්පයෙකු පෙන්වමින් ඌ තමාට දෂ්ට කළ බව රෝහල් කාර්ය මණ්ඩලයට කියා සිටියේ ඉදිමී තිබූ පාදයක්ද ඔවුන්ට පෙන්වමිනි.

විෂ සහිත සර්පයෙකු බව හඳුනාගත් කාර්ය මණ්ඩලයද වහ වහා ඔහුට ප‍්‍රතිකාර කරන්නට සැරසුනද ඒ වන විටත් පදමට වැදී සිටි ඔහු ඊට බාධා කරන්නට වූවේ ඇඳ මත දඟලමින් හා පරුෂ වචන දොඩවමිනි.

ඔහුගේ දැඟලිල්ලත් සමගම ඔහුගේ අතේ වූ ටින් එකේ සිටි සර්පයාද පිටතට පැමිණ එහේ මෙහේ ඇදෙන්නට පටන්ගත් අතර කාර්ය මණ්ඩලය ඉන් දැඩි භීතියට පත් වූවද මෙම පුද්ගලයා ඉන් ලැබුවේ අපූරු ආශ්වාදයකි.

අවසානයේදී කාර්ය මණ්ඩලයට අවසිහියෙන් දඟලන එම පුද්ගලයා පමණක් නොව සිමෙන්ති පොළවේ ලිස්ස ලිස්සා ඇදෙන සර්පයාද මෙල්ල කර ගන්නට සිදුවූවේ දන්නා සියලූ ශිල්ප අනුගමනය කරමිනි.