බුලත්සිංහල ලක්මි කුඩලිගම
ගම්බද ණය දෙන සමිතියකින් ලබාගත් ණය වෙනුවෙන් එහි මාසික වාරිකය ගෙවීම ප්‍රමාදවීම නිසා ණය වාරිකය ඉල්ලා ගෙදරට පැමිණි ණය දෙන මහත්තයා එළවා දැමීමට පොලිසියේ පිහිට පැතූ කාන්තාවක පිළිබඳ පුවතක් බස්නාහිර පළාතෙන් වාර්තාවේ.

සිද්ධිය මෙසේය.

ගමකට පැමිණි කලිසම් හැඳගත් ටයිපටි පැළඳි පෙනුමෙන් වැදගත් යැයි සිතිය හැකි මැදිවියේ මහත්වරුන් පිරිසකි.

ණය දෙන සමිතියක් පිහිටනවා. කතාව පැතිර ගියේ ලැව් ගින්නක් මෙනි. කාන්තාවෝ පිරිසක් රොක්වූහ. කතාව නම් හොඳයි. ඒක හොඳ සමිතියක්. අපේ මිනිහා මට දෙන සල්ලි මදි. මමත් මේකෙන් ණය ගන්නවා. මාසයට දෙන එකෙන් කීයක් හරි එකතු කරල වාරිකය ගෙවනවා.

බොහෝ පිරිසක් මේ සමිතියෙන් ණය මුදල් ගත්හ. කාලයක් ගතවිණ. සමහර කාන්තාවන් කියපු දිනට පොලිය සමග වාරික ගෙව්වත් මේ කියන කාන්තාවට නියමිත වෙලාවට ණය වාරිකය ගෙවීමට නොහැකි විය.
දිනක් හැන්දෑවේ ණය දෙන මහත්තයා නිවෙසට පැමිණියේය. ණය වාරිකේ ගෙව්වේ නැහැ නේද? ඒක අරන් යන්නයි ආවේ.

අනේ මහත්තයා අද නම් දෙන්න විදියක් නැහැ. මහත්තයා එන්න කලින් මෙහෙන් යන්න. පස්සේ මම ණය ගෙවන්නම්. නැත්නම් මම ඉවරයි කීවාය.

ඒවා මට වැඩක් නැහැ. ණය වාරිකය දෙනකම් මම යන්නේ නැහැ. ණය දෙන මහත්තයා කීය.

දැන් රාත්‍රියද උදාවී ඇත. සැමියාද නිවෙසට පැමිණෙන වෙලාවද කිට්ටුය.

කලබල වූ කාන්තාව පොලිස් හදිසි ඇමතුම් අංශයේ පිහිට පැතුවාය. පොලිසිය නිවෙසට පැමිණෙන විට සැමියාද නිවෙසට පැමිණ සිටියේය. සියල්ලම පොලිසියට කැඳවා කාන්තාවක පමණක් සිටින නිවෙසකට වී සිටීම වරදක් බව ණය දෙන සමිතියේ මහත්තයාටත් තමාගේ බිරිඳ පිළිබඳව මීට වඩා අවධානයෙන් සිටින ලෙස සැමියාටත් තම සැමියාට හොර රහසේ මෙවැනි දේ නොකරන ලෙස කාන්තාවටත් තරයේ අවවාද කර මුදාහැර ඇතැයි පැවසේ.