තමා බැලීමට සරොම් අඳින මනමාලයකු නම් කැටුව නොඑන ලෙස මනමාලියගෙන්   නියමිත දින උදේ  ලැබුණු නියෝගයකට සාර්ථක ⁣ලෙස මුහුණ දුන් මඟු‍ල් කපුවකු පිළිබඳව පුවතක් පසුගියදා දකුණේ කඳුකර ගම් ප්‍රදේශයකින් අසන්නට ලැබිණි.

 ඇය ප්‍රදේශයේ යමක් කමක් තිබුණු පවුලක තරුණියකි. මහා රුවැත්තියක නොවුණාට ප්‍රියමනාප රූ සපුවකින් යුක්ත වූවාය. එහෙත්  තමාට ජන්මයෙන් ලැබුණු රූ සපුවට වඩා දෙතුන් ගුණයකින්  තමන් රුවැත්තියෙකැයි සිතා මහත් උද්දාමයෙන් ඉහ වහා ගොස් සිටි ඇයට මවුපියන්  විසින් ගෙනෙන ලද බොහොමයක් මංගල යෝජනා ප්‍රතික්ෂේප කළේ මනාලයාගේ විවිධ අඩුපාඩු කියමිනි.

 ඇයගේ අසීමිත කොන්දේසි නිසා සහකරුවකු සොයා ගැනීම දිනෙන් දින කල් ගොස් විවාහයට නිසි කල වයසද ඉකුත් වෙමින් තිබිණි. කෙසේ වෙතත් මවුපියන්ගේ ඉල්ලීම අනුව  කපුවකු විසින්   සොයා ගනු ලැබූ පහළොස්වෙනි මනමාලයා ඇය බැලීමට පැමිණෙන දිනය උදා විය.

ඔහු හොඳ කඩවසම්  පුද්ගලයෙකි. එතරම් උගත්කමක් නොතිබුණද දෙමාපියන්ගෙන් උරුමවූ ගොඩමඩ ඉඩකඩම්  වගා දිගා කරගෙන වාසය කරන  අහිංසක ගොවි පුත්‍රයෙකි. මනාලියගේ නිවෙසට යාම සඳහා අලු‍ත්ම සරමකින් සහ කමිසයකින් සැරසුණු ඔහු උදෑසනම යෙදුණු  සුබ නැකතින්, නි⁣වසින් පිටත්වූයේ ගමනට පැයක් දෙකක් ගතවන බැවිනි. ඔහු සමඟ  කපු මහතාත් පවුලේ හිතවතෙකු වූ ගමේ පාසලේ ගුරු මහතෙක්  ගමනට එක් වූහ. තමා බැලීමට මෙවර පැමිණෙන මනමාලයා පිළිබඳව තම හිතවතියන් මාර්ගයෙන්  තොරතුරු සොයා  බැලු‍වද හරි  තොරතුරක් කලින් නොලැබුණද ඇයට එදින උදේ ලැබුණු දුරකතන ඇමතුමකින් කියවුණේ මනමාලයා සරොම් කාරයකු බවය.

එය දැන ගැනීමෙන් ඇය බලවත්සේ නොසන්සුන් වූවාය. වහාම කපුවාට දුරකථන ඇමතුමක් ගෙන දොස් කීවේ මනමාලයා සරම්කාරයකු බව තමාට වසං කළේ ඇයිදැයි අසමිනි. එපමණක් නොව සරම්කාරයෙකු නම් තමා බැලීමට කැඳවාගන නොඑන ලෙසද ඇය කපුවාට නියෝග කළාය.

සැණෙකින් කපුවාට ගණදෙවි නුවණ පහළ විය. “මේ මොනව කියනවද නෝනා, අපේ මහත්තයා  කලිසං අඳින්නෙ,  නෝනට කවුරු හරි බොරුවක් කියල”‍  යැයි කියමින් ඇය අස්වසා දුරකථනය විසන්ධි කළේය. උද්ගතව ඇති ප්‍රශ්නය පිළිබඳව මනාලයා සහ ගුරු මහතා සමඟ කතිකා කළ කපුවා මාර්ගය අයිනේ වූ නිවෙසක් අසල වාහනය නතර කරවාගෙන එම නිවැසියන්ගේ අවසරය ලබාගෙන තිදෙනා සමඟ ගොස් ඉස්කෝලෙ මහතාගේ කලිසම මනමාලයාට අන්දවා මනමාලයාගේ සරම ඉස්කෝලෙ මහත්මයාට ඇන්දවීය.

කලිසමේ ප්‍රමාණයේ සුළු සුළු  වෙනස්කම් තිබූ නිසාත් ඔහුට කලිසම නුහුරු නුපුරුදු නිසාත් යම්කිසි  අපහසුතාවක් ඇතිවුවද මනමාලියගේ නිවසේදී හැසිරිය යුතු ආකාරය පිළිබඳව කපු මහතාත් ගුරු මහතාත් යමින් ගමන් උපදෙස් ලබා දී  තිබූ  නිසා කවුරු කවුරුත් ජාමෙ බේරා ගත්තාලු‍

පොල්ගස්ඕවිට 
එස්. වික්‍රමආරච්චි