1977 දී කේවළ ඡන්ද කොට්ඨාස මත පදනම් වූ ලංකාවේ අවසන් මැතිවරණයේදී එක්සත් ජාතික පක්ෂයට 5/6ක බලයක් ලැබිණ. එනම් ඡන්ද කොට්ඨාස 168න් 140ක් ම එජාප ජයග්‍රහණය කළේය. ඒ අනුව ජේ. ආර්. ජයවර්ධන අගමැති බවට පත් වූ අතර, 1978 දී නව ව්‍යවස්ථාවක් සම්මත කර ගත්තේය. ඒ අනුව අගමැති තනතුර වෙනුවට විධායක බලය සහිත ජනාධිපති ධුරයක් ස්ථාපිත කරමින් අගමැති තනතුර “නාම මාත්‍ර” තනතුරක් බවට පත් කළේය. ජේ. ආර්. ජයවර්ධන මහතා ජනාධිපතිවරණයකින් තොරව ව්‍යවස්ථාවට ගෙන එන ලද සංශෝධනයක් අනුව 1978 පෙබරවාරි 04 වැනි දින විධායක ජනාධිපති වශයෙන් දිවුරුම් දුන්නේය.

ඒ අනුව එතැන් සිට වසර 06කට ජනාධිපති ධුරයට පත් ජේ. ආර්. ජයවර්ධන මහතා 1982 ඔක්තෝබර් 20 වැනිදා ජනාධිපතිවරණයක් කැඳවා 52.91%ක් වූ ඡන්ද ප්‍රතිශතයක් ලබා ජයග්‍රහණය කළේය. මහ මැතිවරණය 1983 දී පැවැත්වීමට නියමිතව තිබියදී පවතින 5/6ක ආණ්ඩු බලය තවත් අවුරුදු 6ක් සඳහා උපයෝගි කර ගැන්ම අරමුණු කරගෙන පාර්ලිමේන්තුවේ නිල කාලය තවත් අවුරුදු 6කින් දීර්ඝ කිරීමට 1982 දෙසැම්බර් 22 වැනි දින රට පුරා ජනමත විචාරණයක් පවත්වන ලදී. පවතින පාර්ලිමේන්තු නිල කාලය තවත් අවුරුදු 6කින් දීර්ඝ කළ යුතුය” යන්නට පක්ෂව වැඩි ඡන්ද 535,240ක් ලැබීම නිසා පැවැති පාර්ලිමේන්තුව 1988 තෙක් පැවැතිණි.
ජනමත විචාරණයේදී දිස්ත්‍රික්ක 22න් කළුතර, ගාල්ල, හම්බන්තොට, යාපනය, වන්නි, මඩකළපුව, ත්‍රිකුණාමලය යන දිස්ත්‍රික්කවලින් ආණ්ඩුවේ නිල කාලය දීර්ඝ කිරීමේ යෝජනාව පරාජයට පත් විය. ඡන්ද කොට්ඨාස වශයෙන් ගතහොත් ඡන්ද කොට්ඨාස 168න් 48ක බහුතර ජනතාව තම ඡන්දය පාවිච්චි කර තිබුණේ රජයේ නිල කාලය දීර්ඝ කිරීමට විරුද්ධවය. එම ආසන නම් කෝට්ටේ, කඩුවෙල, මහරගම, කැස්බෑව, ගම්පහ, මහර, පානදුර, මතුගම, කළුතර, බේරුවල, අගලවත්ත, කුණ්ඩසාලේ, බළපිටිය, අම්බලන්ගොඩ, බද්දේගම, රත්ගම, ගාල්ල, අක්මීමන, හබරාදූව, හක්මන, කඹුරුපිටිය, දෙවිනුවර, මාතර, මුල්ගිරිගල, බෙලිඅත්ත, තංගල්ල, තිස්සමහාරාමය, කයිට්ස්, වඩුක්කොඬේ, මනිපායි, කන්කසන්තුරේ, කෝපායි, උඩුප්පිඩි, පේදුරුතුඩුව, චාවාකච්චේරි, නල්ලූර්, යාපනය, කිලිනොච්චි, මන්නාරම, වව්නියාව, මුලතිව්, කල්කුඩා, මඩකළපුව, පදිරිප්පු, ත්‍රිකුණාමලය, මුතූර්, ඇහැලියගොඩ හා ගල්ගමුවයි.

සමස්තයක් වශයෙන් ගත් කල දෙමළ භාෂාව කතා කරන ජනතාව පදිංචි සියලුම දිස්ත්‍රික්කවලින් රජයේ යෝජනාව පරාජයට පත් විය. ජනමත විචාරණයෙන් පරාජයට පත් වූ ආසනවල ජනමතය යළි විමසීමට අවශ්‍ය බව ජනාධිපති ජේ. ආර්. ජයවර්ධන මහතා ආණ්ඩු පක්ෂයට යෝජනා කළ අතර, ඒ අනුව එජා පක්ෂයෙන් තේරීපත් වූ සියලුම මන්ත්‍රීවරුන්ට දිනය නොදා ඉල්ලා අස්වීමේ ලිපි ලබාදෙන ලෙස ඉල්ලා සිටියේය.

ඒ අනුව එජා පක්ෂය පරාජයට පත් ආසන 29න් 18ක මන්ත්‍රීවරු ඉල්ලා අස්වූ බව 1983 පෙබරවාරි 10 වැනිදා කතානායක බාකීර් මාකර් මහතා නිවේදනය කළේය. ඒ අනුව 1983 මැයි 18 වැනිදා අතුරු මැතිවරණ 18ක් පවත්වන ලද අතර, ඉන් 14ක් එජාප ජය ගත්තේය. නමුත් 1978 ආණ්ඩුක්‍රම ව්‍යවස්ථාව අනුව අතුරු මැතිවරණ පැවැත්වීමක් නොකරන අතර මන්ත්‍රීවරයෙකු පුරප්පාඩු වුවහොත් පක්ෂ ලේකම් ඒ වෙනුවට වෙනත් අය පත් කළ යුතු විය.

මේ වනවිට උතුරේ එල්.ටී.ටී.ඊ. සංවිධානයේ ත්‍රස්ත කටයුතු ව්‍යාප්ත වෙමින් පැවැති අතර ජාත්‍යන්තර ආධාර ඔවුනට ලැබෙමින් තිබිණි.

මෙම තත්ත්වය නිසා ශ්‍රී ලංකාවේ හෝ ඉන් පිටත සිටින කිසිම පුද්ගලයකු රට දෙකඩ කිරීමට කටයුතු කිරීම, ආධාර හෝ අනුබල දීම නොඑසේ නම් එවැනි ව්‍යාපාර සඳහා මුදල් යෙදවීම දඬුවම් ලැබිය යුතු වරදක් ලෙස නම් කරමින් 1983 අගෝස්තු 5 වැනිදා ශ්‍රී ලංකාණ්ඩුක්‍රම ව්‍යවස්ථාවට ගෙන එන ලද සය වැනි සංශෝධනය පාර්ලිමේන්තුව මඟින් සම්මත කරනු ලැබීය.

මේ අනුව ශ්‍රී ලංකා ප්‍රජාතාන්ත්‍රික සමාජවාදී ජනරජ ව්‍යවස්ථාව ආරක්ෂා කොට අනුගමනය කරන බවට පාර්ලිමේන්තු මන්ත්‍රීවරු සියලු දෙනාම 1983 අගෝස්තු මාසයේදී යළිත් දිවුරුම් දිය යුතු විය. පාර්ලිමේන්තු මන්ත්‍රීවරු 225න් ද්‍රවිඩ එක්සත් විමුක්ති පෙරමුණේ මන්ත්‍රීවරු 16 දෙනෙක් එසේ දිවුරුම් දීම ප්‍රතික්ෂේප කළේය. එසේ දිවුරුම් දීම ප්‍රතික්ෂේප කළ මන්ත්‍රීවරු 16 දෙනා පාර්ලිමේන්තුව වර්ජනය කළහ. නිවාඩු නොලබා තුන් මසක් මැති සබයට නොපැමිණීම නිසා පහත සඳහන් මන්ත්‍රීවරු 16 දෙනාගේ මන්ත්‍රී ධුර අහිමි විය.

1. කයිට්ස් - කේ. පී. රත්නම්

2. වඩුක්කොඬේ - ටී. තිරුනාවුකරසු

3.  කන්කසන්තුරේ - ඒ. අමිර්තලිංගම්

4. මනිපායි - වී. ධර්මලිංගම්

5. කෝපායි - ඒ. එම්. අලාලසුන්දරම්

6. උඩුප්පිඩි - ටී. රාසලිංගම්

7. පොයින්ට් පේදුරු - කේ. තුරෙයිරත්නම්

8. චාවාකච්චේරි - වී. එන්. නවරත්නම්

9. නල්ලුර් - ඇම්. සිවසිත්නම් පරම්

10. යාපනය - ටී. යෝගේෂ්වරන්

11. කිලිනොච්චි - වී. ආනන්ද සංගරී

12. මන්නාරම - පී. එස්. සුසෙයිදාසන්

13. මුලතිව් - එස්. එම්. සෙල්ල තම්බු

14. වව්නියා - ටී. සිවසින්නම් පරම්

15. ත්‍රිකුණාමලය - ආර්. සම්බන්ධන්

16. පදිරිප්පු - පී. ගනේෂලිංගම්

මාස 3ක් නොකඩවා පාර්ලිමේන්තුවට නොපැමිණීම නිසා මන්ත්‍රී ධුර 16ක් එකවර අහිමි වීම පාර්ලිමේන්තු ඉතිහාසයේ වාර්තාවකි. මේ අය එකම දේශපාලන ධාරාවකට අයත් වීම ද විශේෂයකි.

බණ්ඩාරගම - සමරසේන මුදලිගේ